Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 460 Hüküm no: 409 Orijinal metin no: [130b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Macuncu Kasım mahallesindeki evin Esma bt. Hasan’a kiraya verilmesi Haremeyn Vakfı’na bi’l-fi‘il mütevellî olan fahrü’l-akrân Ömer Ağa b. ( ) mahfil-i kazâda Esmâ bt. Hasan nâm hatun mahzarında ikrâr ve takrîr-i kelâm edip vakf-ı mezbûrdan mahmiye-i İstanbul’da Macuncu Kasım mahallesinde vâki‘ lede’l-ahâlî hudûd[u] ma‘lûm olup bir beyt-i süflî ve cüneyneyi ve kenîfi müştemil olan menzil vech-i âtî üzere îcâr olunmak vakfa enfa‘ olduğu sikāt haberi ile mütehakkık oldukdan sonra kirâren müzâyede olunup ba‘de inkıtâ‘-ı ragabât-ı nâs bin akçe icâre-i mu‘accele ve ayda on beş akçe icâre-i müeccele ile mezbûre Esmâ üzerinde karâr edip ziyâde ile tâlib-i âhar zuhûr etmeyip ve semen-i mezbûr semen-i misli olmağın ben dahi tevliyetim hasebi ile menzil-i mezbûru mezbûre Esmâ Hâ[tu]n’a bin akçe icâre-i mu‘accele ve ayda on beş akçe ücret-i müeccele ile îcâr edip ol dahi vech-i muharrer üzere istîcâr ve kabûl eyledikden sonra meblağ-ı mezbûr bin akçeyi bi’t-tamâm ve’l-kemâl yedinden kabz edip tasarrufuna izin verdim dedikde gıbbe’t-tasdîk mâ-vaka‘a bi’t-taleb ketb olundu. Hurrire fî-evâhiri Zilka‘deti’ş-şerîfe sene erba‘a ve selâsîn ve elf mine’l-hicreti’n-Nebeviyye ve aleyhi efdalü’t-tahiyye. Şühûdü’l-hâl: Fahrü’l-akrân İbrahim Efendi el-mülâzım, Abdülhalim Çelebi b. eş-Şeyh Mehmed el-vâ‘iz, Siyavuş b. Abdullah.