Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 99 Hüküm no: 17 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Osman’ın Rahime bt. Ramazan Çavuş’a câriye ve eşyalarını hibe ettiği Mahmiye-i İstanbul’da Dülgerzâde mahallesi sâkinelerinden Âişe bt. Osman Ağa nâm hâtun meclis-i şer‘-i şerîfde vâlidesi bâ‘isetü’l-kitâb Rahime bt. Ramazan Çavuş nâm hâtun mahzarında ikrâr ve takrîr-i kelâm edip vâlidem mezbûre Rahime Hâtun’un bundan akdem bana hibe ve teslîm, ben dahi ittihâb ve tesellüm ettiğimden sonra mezbûre Rahime’ye i‘âre ve teslîm edip ol dahi kabz etmekle yedinde olan evsâfı beynimizde ma‘lûme Rûsiyyetü’l-asl Şahin bt. Abdullah nâm câriyemi ve beynimizde ma‘lûm bir çift zümrüd küpe ve bir çift mücevher altın bilezik ve bir mücevher kuşak ve yirmi aded Bursa yastığı ve yirmi iki aded yemeni yorgan ve dört kaliçe ve iki orta keçe ve sekiz yan keçelerimi ve on dört minder ve iki kebîr leğen ve on iki sahan ve on tencere ve bir demir sinimi vâlide-i mezbûre Rahime Hâtun’a şurût-ı müfsideden âriye hibe-i sahîha-i şer‘iyye ile hibe edip ol dahi kabûl eyledi min ba‘d mezbûre Şahin [ve] eşyâ-i mezbûre merkūme Rahime’nin mülk-i mevhûbudur, benim alâkam yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, İbrahim Çelebi b. Mehmed, Resul b. Rıdvan, Mustafa Çelebi b. el-Hâc Ahmed.