Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 462 Hüküm no: 411 Orijinal metin no: [131b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dizdariye mahallesindeki Hüseyin Çavuş b. Abdullah’ın vakfettiği ve Haremeyn Vakfı’na intikal eden evin Sefer b. Abdullah ve Selime bt. Abdullah’a kiraya verilmesi Haremeyn-i Şerîfeyn Vakfı’na bi’l-fi‘il mütevellî olan Ömer Ağa b. Mustafa meclis-i şer‘de sâhibü’l-kitâb Sefer b. Abdullah ve Selime bt. Abdullah mahzarında ikrâr edip mahmiye-i mezbûrede Dizdariye mahallesinde sâkin iken vefât eden merhûm Hüsrev Çavuş b. Abdullah hâl-i hayâtında silk-i mülkünde münselik mahalle-i mezbûrede vâki‘ lede’l-ahâlî ma‘lûmü’l-hudûd olup bir beyt-i ulvî ve bir beyt-i süflî ve kenîfi müştemil menzilini vakf edip süknâsını evvelâ nefsine, ba‘dehû evlâdına, ba‘dehüm utekāsına, ba‘dehüm evlâd-ı utekāsına, ba‘de’l-inkırâz îcâr olunup hâsıl olan icâresi Medîne-i Münevvere fukarâsına irsâl oluna deyu şart etmişdi. El-hâletü hâzihî meşrûtün-lehüm bi’l-külliye münkarız olmağla menzil-i mezbûrun galle ve tasarrufu cânib-i vakf-ı mezbûra âid olduğu, vech-i âtî üzere îcâr her vechile vakfa enfa‘ olduğu sikāt haberiyle mütehakkık oldukdan sonra müzâyede olunup ragabât-ı nâs inkıtâ‘ından sonra mezbûrân Sefer ve Selime üzerinde yevmî bir akçe icâre-i müeccele ile râyicü’l-vakt dört bin akçe ücret-i mu‘accele karâr edip ziyâde ile tâlib-i âhar bulunmadığı, ben dahi anlara vech-i muharrer üzere îcâr edip meblağ-ı mezbûru yedlerinden kabz edip tasarruflarına izin verdim dedikde gıbbe’t-tasdîk bi’t-taleb ketb olundu. Hurrire fî-evâsıtı Zilhicceti’ş-şerîfe sene 1034. Şühûdü’l-hâl: El-Hâc Hasan b. Mehmed, Mehmed b. Ramazan, Hüseyin [b.] Ramazan, Ahmed [b.] Mehmed, Ali [b.] Mustafa, Mustafa [b.] Himmet.