Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 464 Hüküm no: 415 Orijinal metin no: [132a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fenerzâde Mehmed Reis b. Mustafa’nın vakfiyesi Vaddaha ve sahha mâ-fîhi ledeyye ve’t-tezeha cemî‘uhû beyne yedeyye ve hakemtü bi’s-sıhhati ve’l-lüzûmi ale’l-vechi’l-mersûm vâkıfen bi-mevâkıfi’l-hilâfi’l-cârî beyne’l-eimmeti’l-eslâf harrere’l-fakīr ileyhi te‘âlâ Ahmed b. Mehmed el-müvellâ hilâfeten bi-medîneti Galata el-mahmiye -afâ anhümâ ve gafera lehümâ- Elhamdülillâhi’llezî hedâ ba‘z ibâdihî mine’l-mü’minîn ve’l-mü’minât ilâ-sebîli’l-hayrât ve turukı’l-meberrât ve rafa‘a kaderehüm bi’l-irtikāi ile’d-derecâti’l-âliyât ve’s-salâtü alâ-eşrefi’l-mahlûkāt ve seyyidi’l-kâinât Muhammed eş-şâfi‘ el-müşeffi‘ fî-hakkı ashâbi’l-enâm yevme yü’hazü bi’n-nevâsî ve’l-akdâm ve alâ-âlihî ve ashâbihi’l-kirâm ammâ ba‘d. İşbu mazmûnunda vakıf ikrârından bahseden sahîh ve şer‘î bir hüccettir. Hâric-i mahmiye-i Galata’da vâki Tophâne kasabası mahallâtından el-Hâc Memi mahallesinde sâkin sâhibü’l-hayrât râgıbü’s-sadakāt Fenerzâde diye meşhûr Mehmed Reis b. Mustafa nâm kimse dünyânın fâni, âhiretin bâki olduğunu tedebbür edip âhıret azığı tedârik etmeyi murâd ettiğinde meclis-i şer‘-i şerîfe gelip şöyle ikrâr ve i‘tirâf eyledi ki, işbu vakıf ikrârının kendisinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, üç bâb tahtânî hâneyi, iki sofayı, su kuyusunu, kenîfi ve hadîkayı müştemil, hudûdu bir tarafından el-Hâc Mehmed b. Nazar mülkü, el-Hâc Mustafa b. Mehmed mülkü, Sefer Reis b. Bünyamin mülkü, İsmail b. Abdullah mülkü, Hasan b. Abdullah mülkü, el-Hâc Mustafa eş-şehîr bi-Karatorun mülkü, tarîk-ı hâs ve vâkıf-ı mezbûr mülkü ile mahdûd cemî‘ menzilini cümle tevâbi‘i ve levâhıkıyla niyet-i sâfiye ve taviyyet-i vâfiye üzere habs ve vakfetti. Menzil-i mezbûrda süknâyı mâdâm ki hayâtda ola evvela kendisine, ba‘de vefâtihî amcasının kızı Âişe bt. Receb ve halîlesi Hadice bt. Abdullah’a ve Büyük Rıdvan diye meşhûr Rıdvan b. Abdullah nâm mu‘takına ve diğer mu‘takı Kaytas’a şart etti. Ba‘de vefâtihim, li-evlâdihim, evlâd-ı evlâdihim ile’l-inkırâz evlâd-ı evlâd-ı evlâdihime şart etti. Ba‘de inkırâzil’l-kül, menzil-i mezbûrun mütevellî yediyle icâreye verilip hâsıl olan ücret-i kirânın Medîne-i münevvere fukarâsına irsâlini şart etti. Menzil-i mezbûru tescîl maksadıyla mütevellî nasbettiği el-Hâc Mustafa b. Mehmed’e teslîm etti. O dahi tesellüm edip sâir mütevellîler evkāfda nasıl tasarruf ettiler ise öyle tasarruf eyledi. Mütevellî-i mezbûr vâki‘ ikrârı vicâhen ve şifâhen tasdîk etti. Emr-i vakf-ı mezbûr vech-i mastûr üzere tamâm olduğunda vâkıf-ı mezkûr İmâm-ı a‘zam Ebû Hanîfe katında vakfın adem-i lüzûmuna mütemessiken vakfiyyetten rücû‘ edip menzilin mülk-i sahîhine ilhâkını talep ve istirdâd eyledi. Mütevellî, imâmeyn-i hümâmeynin re’ylerine tevfîkan redden imtinâ‘ edince hâkim-i muvakki‘ü’l-kitâb huzûrunda murâfa‘a edip tarafeynden hüküm taleb ettiklerinde hâkim-i mûmâ-ileyh, cânib-i vakfı ihtiyâr edip menzil-i merkūmun vakfiyetinin lüzûmuna -âlimen bi’l-hilâf beyne’l-eimmeti’l-eşrâf- hükmetmekle vakf-ı mezbûr müseccel, müebbed bir vakıf olarak bi’l-ittifâk evkāf-ı lâzimeden oldu. Fe-men beddelehû ba‘de mâ-semi‘ahû fe-innemâ ismühû ale’llezîne yübeddilûnehû inna’llâhe semî‘un alîm. Ve ecrü’l-vâkıf ale’l-hayyi’l-cevâdi’l-kerîm. Cerâ zâlike ve hurrire fî-6 Rebî‘ülâhir li-sene 1034. Şühûdü’l-hâl: El-hâc Mehmed b. Nazar, el-Hâc Mehmed b. Mahmud, Kābil b. Abdullah, Mehmed b. Abdullah, Mehmed b. Ferruh, Pîrî . Abdünnebi