Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 465 Hüküm no: 416 Orijinal metin no: [132b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayreddin Bey mahallesinde Haremeyn Vakfı’na intikal eden evin Darüssaade ağalarından Abdülkerim Ağa’ya kiraya verilmesi Mahmiye-i İstanbul’da Haremeyn-i Şerîfeyn Vakfı’na bi’l-fi‘il mütevellî olan Ömer Bey b. Mustafa meclis-i şer‘-i şerîfde hâlâ Dârüssaâde ağalarından iftihârü’l-havâs ve’l-mukarrebîn Abdülkerim Ağa b. Abdülmüteâl mahzarında ikrâr-ı tâm ve takrîr-i kelâm edip sâhibü’l-hayrât merhûm Mustafa Kethüdâ mahmiye-i mezbûrede Ayasofya-i Kebîr kurbünde Hayreddin Bey mahallesinde vâki‘ bir tarafı merhûme Âişe nâm hatun vakfı ve üç tarafı tarîk-i âmma müntehî hâriciyyesinde on bâb fevkānî odayı ve bir ahırı ve anbârı ve kameriye ve tahta-pûş ve kenîfi ve dâhiliyyesinde beş bâb fevkānî odayı ve orta sofayı ve bir hamâm ve hamâma muttasıl tahtânî üç bâb odayı ve bir matbah ve iki kîlârı ve hadîka ve mahtabı ve kameriye ve dahlîzi ve bi’r-i mâ ve kenîfi müştemil olan menzilini vakf ve habs edip süknâsını evvelâ kendi nefsine, ba‘dehû evlâdına ve evlâd-ı evlâdına, ba‘dehüm zevcesi Ümmühani bt. Mustafa Bey’e, ba‘dehâ gallesini Medîne-i Münevvere fukarâsına ve tasarrufu Haremeyn mütevellîsine deyu şart etmişdi, lâkin meşrûtün-lehümden cümlesi münkarız olmağla ber-mûceb-i şart-ı vâkıf vech-i ma‘rûf üzere bundan akdem mutasarrıfı olan Mustafa Çavuş b. Abdi Bey vefât edip evlâdı kalmamağla vakfa âid olmağın vech-i âtî üzere îcâr olunmak lâzım geldikde müzâyede olunup ragabât-ı nâs inkıtâ‘ından sonra râyicü’l-vakt iki yüz elli bin akçede mûmâ-ileyhin üzerinde karâr edip ziyâde ile tâlib-i âhar zuhûr etmemeğin ve meblağ-ı merkūm ecr-i misli idiği mütebeyyin olmağın ben dahi tevliyyetim hasebiyle meblağ-ı merkūm iki yüz elli bin akçe icâre-i mu‘accele ve yevmî sekizer akçe icâre-i müeccele ile müşârun-ileyh Abdülkerim Ağa’ya îcâr edip ol dahi vech-i muharrer üzere istîcâr ve kabûl etmeğin meblağ-ı mezbûru yedinden vakf için alıp tasarrufuna izin verdim dedikde gıbbe’t-tasdîk bi’t-taleb ketb olundu. Fî-evâhiri Zilhicceti’ş-şerîfe li-sene erba‘a ve selâsîn ve elf. Şühûdü’l-hâl: Süleyman Kethüdâ b. Abdüddâim, İbrahim Çelebi b. Ebîbekir, Ali Efendi el-kādî, Halil Efendi b. Mahmud, Baltacılar Kethüdâ[sı] Ahmed Ağa b. Rüstem, Behram Efendi b. Abdullah, Osman Efendi b. Yasin, Mustafa Bey b. Yusuf el-bevvâb.