Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 466 Hüküm no: 417 Orijinal metin no: [132b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Kasım b. Cuma’nın kiracı olduğu Haremeyn Vakfı’na ait Elvanoğlu mahallesindeki evi tamir ettirmesi Haremeyn-i Şerîfeyn Vakfı’ndan olup mahrûsa-i İstanbul’da Elvanoğlu mahallesinde vâki‘ bir tarafdan Arabacılar mahallesinin avârızına mevkūf menzil ve bir tarafdan Emine bt. ( ) nâm Hatun mülkü ve bir tarafdan merhûm Sem‘î Efendi veresesi mülkleri ve bir tarafdan vakf-ı mezbûr ve bir tarafdan tarîk-i hâs ile mahdûd olan vakf menzilin icâre-i mu‘accele ve müeccele ile müste’ciri olan bâ‘isü hâze’l-kitâb el-Hâc Kasım b. Cuma nâm kimesne meclis-i şer‘-i şerîfde takrîr-i kelâm edip vech-i âtî üzere harc u sarf ettiğim meblağ icâre-i mu‘acceleme mahsûb olmak üzere bundan akdem izn-i şer‘ ve ma‘rifet-i mütevellî ile menzil-i mezbûrda olan fevkānî iki bâb oda yerini tecdîd ve birinin bazı yerini meremmet eylemişdim, kıbel-i şer‘den üzerine varılıp harc ettiğim meblağın mertebe-i tahammülü keşf ve tahmîn olunması matlûbumdur dedikde savb-ı şer‘den Mevlânâ Halil Efendi b. Mahmud ve hâssa mi‘mârlardan Üstâd Ali Çelebi b. Halil ve vakf-ı mezbûrun mütevellîsi fahrü’l-akrân Ömer Bey tarafından vakfın câbîsi Mustafa Çelebi irsâl olunup anlar dahi zeyl-i kitâbda mastûr ebniye ve sukūfa vukūfu olan bî-garaz Müslimîn ile üzerine varıp müşâhede ettiklerinde fi’l-vâki‘ zikr olunan iki bâb odanın ve tahtabendin ve tahtânî bir odanın tuğla yerine döşenilen bi-hesâb-ı şatrancî cem‘an iki yüz on yedi zirâ‘ tahta döşemesine her zirâ‘ı yirmişer akçeden dört bin üç yüz kırk akçe ve iki odanın altmış zirâ‘ Mehmed dîvânına beher zirâ‘ yirmi beşer akçeden bin beş yüz akçe ve cedîd odanın yirmi dört zirâ‘ taş duvarına kırkar akçeden dokuz yüz altmış akçe ve altmış dört zirâ‘ dolma duvarına sıvasıyla yirmişer akçeden bin iki yüz seksen akçe ve cedîd odanın yetmiş yedi zirâ‘ yeni sakfına kırkar akçeden üç bin seksen akçe ve büyük odanın doksan zirâ‘ mahlût sakfına on beşer akçeden bin üç yüz elli akçe ve tahtânî mücedded kenîfe bin akçe ve üç dolâb üç yüz altmış akçe ve iki nerdübân sekiz yüz akçe ve üç masandra bin üç yüz akçe ve kuyunun tahliyye ve ağızlığına? yedi yüz akçe ve üç yeni kapı dokuz yüz akçe ve iki cam çârçûbesiyle üç yüz akçe ve hırdavât-ı meremmete iki bin yüz akçe cem‘an on dokuz bin dokuz yüz yetmiş akçe harc u sarf olunup bundan noksân ile kābil değildir deyu bi’l-ittifâk haber verdiklerin mevlânâ-yı mezbûr mahallinde tahrîr ba‘dehû vukū‘u üzere meclis-i şer‘a inhâ edicek, mâ-vaka‘a bi’t-taleb kayd şüd. Hurrire fî-evâhiri şehri Zilhicce li-sene erba‘a ve selâsîn ve elf. Şühûdü’l-hâl: Fahrü’l-eimme Sinan Efendi b. Ali, el-Hâc Selim b. İbad, Ali Çelebi b. Mehmed er-râcil, İsmail Çelebi b. ( ) el-kâtib, Mustafa Bey b. Yusuf el-bevvâb.