Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 467 Hüküm no: 418 Orijinal metin no: [133a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tomtom mahallesindeki Haremeyn Vakfı’na ait evin İbrahim ve Ümmi veledey Seydi Reis’in vefatları üzerine Mirza Bey b. Kemal’e kiraya verilmesi Haremeyn-i Muhteremeyn Vakfı’na bi’l-fi‘il mütevellî olan fahrü’l-akrân Ömer Bey b. Mustafa nâm cündî meclis-i şer‘-i şerîfde bâ‘isü’l-kitâb Mirza Bey b. Kemal nâm bevvâb-ı sultânî mahzarında ikrâr edip vakf-ı mezbûrdan olup mahmiye-i Galata’ya tâbi‘ kasaba-i Tophane mahallâtından Tomtom mahallesinde vâki‘ bir tarafı tarîk-i âm ve bir tarafı mezbûr Mirza Bey mülkü ve bir tarafı müezzine meşrût vakıf menzil ve bir tarafı Ahmed Bey mülkü ile mahdûd bir beyt-i ulvî ve bir beyt-i süflî ve bir sofa ve bi’r-i mâ ve cüneyneyi müştemil menzili icâre-i mu‘accele ve müeccele ile mutasarrıf olan İbrahim ve Ümmi veledey Seydi Reîs bilâ-veled fevt olmalarıyla menzil-i mezbûrun galle ve tasarrufu cânib-i vakf-ı mezbûra âid olup vech-i âtî üzere îcâr olunmak vakfa enfa‘ idiği mütehakkık olmağın müzâyede olunup ragabât-ı nâs inkıtâ‘ından sonra mezbûr Mirza Bey üzerinde râyicü’l-vakt dört bin beş yüz akçede karâr edip ziyâde ile tâlib-i âhar zuhûr etmeyip ve meblağ-ı merkūm ecr-i misli idiği mukarrer olucak, ben dahi tevliyetim hasebiyle meblağ-ı merkūm dört bin beş yüz akçe icâre-i mu‘accele ve yevmî bir akçe icâre-i müeccele ile mezbûr Mirza Bey’e îcâr edip ol dahi vech-i muharrer üzere istîcâr ve kabûl eyledikden sonra meblağ-ı merkūm dört bin beş yüz akçeyi yedinden vakıf için alıp tasarrufuna izin verdim dedikde gıbbe’t-tasdîk bi’t-taleb ketb olundu. Fî-evâhiri Zilhicceti’ş-şerîfe sene erba‘a ve selâsîn ve elf. Şühûdü’l-hâl: Ali Efendi el-kādî, İbrahim Çelebi b. Ebîbekir, Halil Efendi el-müderris, Abdülhalim Çelebi el-müderris, Mustafa Bey b. Yusuf el-bevvâb, Mehmed Bey b. Gazanfer el-câbî, Ali Çelebi b. Pîrî el-câbî, İsmail Bey b. ( ) el-câbî, Mustafa Çelebi b. ( ) el-câbî, diğer Mustafa Çelebi el-kâtib.