Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 467 Hüküm no: 419 Orijinal metin no: [133a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’nın Sultan Beyazid mahallesinden Mihal v. Anton’daki alacağının tahsil edilmesi Dergâh-ı Âlî -mahfûfen bi’l-me‘âlî- bevvâblarından olup bundan akdem mahrûsa-i İstanbul’da Haremeyn-i Muhteremeyn nükūd-ı mevkūfesine bi’l-fi‘il mütevellî olan Mustafa Bey b. Kurd nâm kimesne meclis-i şer‘-i şerîfde mahmiye-i Galata dâhilinde vâki‘ Sultân Bayezid mahallesi sâkinlerinden râfi‘ü’l-kitâb Mihal v. Anton nâm zimmî muvâcehesinde ikrâr ve takrîr-i kelâm edip bundan akdem mezbûr Mihal nükūd-ı mezbûreden olup mütevellî-i sâbık Güncî Mustafa Bey nâm kimesne yedinden mu‘âmele tarîkı ile ahz u kabz ettiği râyic fi’l-vakt asl-ı mâl yetmiş bin akçeyi ba‘dehû ben mütevellî olmağla mezbûr Mihal yedinden vakıf için bi’t-tamâm ve’l-kemâl alıp kabz eyledim, mersûm Mihal zimmetinde meblağ-ı mesfûr yetmiş bin akçeden ve asl-ı mâlı teslîm ettiği âna gelince ma‘mûle olmuş ribhinden bir akçe ve bir habbe bâkī kalmayıp bi-vechin mine’l-vücûh da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Hurrire fî-gurreti Muharremi’l-harâm li-sene hamse ve selâsîn ve elf. Şühûdü’l-hâl: İbrahim Efendi b. Ebîbekir el-Mülâzım, Mehmed Bey b. Abdullah er-râcil, el-Hâc Ahmed b. Mahmud, Hasan Çelebi b. Hüseyin, Siyavuş b. Abdullah.