Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 468 Hüküm no: 420 Orijinal metin no: [133a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirmasti mahallesindeki Haremeyn Vakfı’na intikal eden evin Mustafa Bey b. Haydar’a kiraya verilmesi Haremeyn Vakfı’na bi’l-fi‘il mütevellî olan Ömer Bey b. Mustafa mahfil-i kazâda sâhibü’l-kitâb Mustafa Bey b. Haydar nâm kimesne mahzarında ikrâr ve takrîr-i kelâm edip mahmiyye-i İstanbul’da Kirmasti mahallesinde sâkine iken vefât eden Gülahmer? Hatun hâl-i hayâtında silk-i mülkünde münselik mahalle-i mezbûrede vâki‘ bir tarafı Seyfullah Efendi türbesi ve bir tarafı Solak Abdurrahman Çelebi mülkü ve bir tarafı Ebulfazl Vakfı ve bir tarafı tarîk-i âm ile mahdûd olup muhavvata-i dâhiliyyesi bir oda ve bir sofa ve bir tahtânî [ve] fevkānî iki kîlârı ve bir sundurma ve matbahı ve zîr-i zemîni ve kenîfi ve muhavvata-i hâriciyyesinde fevkānî ve tahtânî iki odayı ve bi’r-i mâ ve gurfe ve dahlîz ve kenîfi müştemil menzilini vakf edip süknâsını evvelâ nefsine, ba‘dehâ îcâr olunup hâsıl olan icâresi Medîne-i Münevvere fukarâsına irsâl oluna deyu şart etmişdi. El-hâletü hâzihî mezbûre Gülahmer? Hatun vefât etmekle menzil-i mezbûrun galle ve tasarrufu cânib-i vakfa âid olup vech-i âtî üzere îcâr her vechile vakfa enfa‘ idiği mütehakkık olmağın müzâyede olunup ragabât-ı nâs inkıtâ‘ından sonra mezbûr Mustafa Bey üzerinde on dört bin akçe icâre-i mu‘accele ve yevmî bir akçe ücret-i müeccele ile karâr edip ziyâde ile tâlib-i âhar zuhûr etmeyip ve semen-i mezbûr semen-i misl olmağın ben dahi menzil-i mezbûru vech-i muharrer üzere merkūm Mustafa Bey’e îcâr eyleyip ol dahi istîcâr eyledikden sonra meblağ-ı mezbûr on dört bir akçeyi bi’t-tamâm ahz edip tasarrufuna izin verdim dedikde gıbbe’t-tasdîk mâ-vaka‘a bi’t-taleb ketb olundu. Hurrire fî-evâsıtı Zilhicce li-sene erba‘a ve selâsîn ve elf. Şühûdü’l-hâl: es-Sâbıkūn.