Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 471 Hüküm no: 423 Orijinal metin no: [134a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çatma Mescid mahallesindeki Fatma Hatun bt. Abdullah’ın vakfettiği ve Haremeyn Vakfı’na intikal eden evin başkasına kiraya verilmesi Haremeyn-i Muhteremeyn Vakfı’na bi’l-fi‘il mütevellî olan fahrü’l-akrân Ömer Bey b. Mustafa nâm cündî meclis-i şer‘de takrîr-i kelâm edip mahmiye-i Galata’ya tâbi‘ kasaba-i Kasım Paşa’da Çatma Mescid mahallesinde sâkine iken bundan akdem fevt olan sâhibetü’l-hayrât Fâtıma Hatun bt. Abdullah hâl-i sıhhatinde silk-i mülkünde münselik olup mahalle-i mezbûrede vâki‘ bir tarafı Hasan b. Abdullah mülkü ve bir tarafı Saâdet Hatun bt. Abdullah mülkü ve iki tarafı tarîk-i âm ile mahdûd tûlen ve arzen hesâb-ı şatrancî üzere sekiz yüz elli dört zirâ‘ arsa üzerine mebnî iki beyt-i ulvî ve bir sofa ve bir dahlîz ve bir fevkānî kîlâr ve bir beyt-i süflî ve bir mahtab ve iki cüneyneyi müştemil menzilini vakf ve habs edip süknâsını evvelâ kendi nefsine, ba‘dehâ Razaman b. Abdullah ve Süleyman b. Abdullah nâm kimesnelere, ba‘dehümâ evlâdlarına, ba‘de’l-inkırâz Medîne-i Münevvere fukarâsına şart etmişdi. El-hâletü hâzihî meşrûtün-lehüm bi’l-külliye münkarız olmağla menzil-i mezbûr cânib-i vakf-ı mezbûra âid olmuşdur, kıbel-i şer‘-i şerîfden üzerine varılıp hakīkat-i hâl keşf ve tahrîr ve menzil-i mezbûr âhara îcâr olunmağa izin verilmesi matlûbumdur dedikde savb-ı şer‘-i mutahhardan Mevlânâ Ali Efendi ve hâssa mi‘mârlardan Üstâd Ali Çelebi b. Halil irsâl olunup anlar dahi zeyl-i kitâbda isimleri mastûr Müslimîn ile menzil-i mezbûra varıp nazar ve mesâha eylediklerinde mütevellî-i mezbûrun takrîrine muvâfık bulunmadığını mevlânâ-yı mezbûr mahallinde tahrîr, ba‘dehû meclis-i şer‘de haber vermeğin menzil-i mezbûru âhara îcâra izin birle mâ-vaka‘a ketb olundu. Fî-evâhiri Zilka‘de li-sene erba‘a ve selâsîn ve elf. Şühûdü’l-hâl: Abdullah Efendi [b.] Ömer el-imâm, Mehmed b. Ali, Ahmed Çelebi b. Kemal, Mehmed Çavuş b. Abdullah, Mehmed b. Mustafa el-müezzin.