Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 471 Hüküm no: 424 Orijinal metin no: [134a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Ağa b. Murad ile hanımı Saliha’nın el-Hac Hasanzâde mahallesindeki evlerini vakfetmeleri Hamd-i fâik ve senâ-yı lâyık ol mâlikü’l-mülk ve’l-melekût rabbü’-izzeti ve’l-ceberût celle sultânuhû ve amme alel’l-âlemîn birruhû ve ihsânuhû hazretlerinin dergâh-ı azîmet-penâh-ı mukaddeslerine ref‘ olunur ki, cümle kâinatı bî-halel ve bî-kusûr ve hıtta-i arzı vücûd-ı pür-cûd-ı insânla müşerref ve ma‘mûr eyledi ve dürûd-ı salât u selâm-ı hüceste-nizâm ol medîne-i ilm u hilm ü temkîn gencîne-i vahy-i rabbü’l-âlemîn hâtemü silsileti’l-mürselîn şâh-ı rüsul muktedâ-yı küll Muhammed Mustafa -sallallâhü te‘âlâ aleyhi ve sellem teslîmen kebîren hazretlerinin ravza-i raziyye ve hatre-i hatîrelerine îsâr olunur ki, sâlik-i râh-ı hidâyet olan ümmet-i âli-himmeti sırât-ı müstakīme delâlet eyleyip dârü’n-na‘îme da‘vet eyledi ve cemî‘-i âl ve ashâb-ı saâdet-intibâhlarının ervâh-ı tayyibelerine nisâr olunur ki, herbiri tarîk-i hakka hâdî ve sebîl-i tevfîka münâdî olup hâmî-i humât-ı dîn ve vâlî-i livâ-i fazl u yakīn olmuşlardır -rıdvânullâhi te‘âlâ aleyhim ecma‘în- ilâ-yevmi’l-haşr ve’d-dîn ammâ ba‘d, işbu vesîka-i şerîfe-i şer‘iyye ve bu enîka-i sarîha-i mer‘iyyenin sâhibleri ve hayrât ve hasenâtın dâ‘îleri Dergâh-ı Âlî cündîlerinden mahmiye-i İstanbul’da el-Hâc Hasanzâde mahallesi sâkinlerinden olup vakf-ı âtîyi ikrâra ba‘dehû rücû‘a kendi tarafından asîl ve zevcesi Saliha bt. el-Hâc Himmet tarafından vekîl olup vech-i mu‘teber üzere vekâleti sâbite olan kıdvetü’l-emâcid Mehmed Ağa b. Murad nâm kimesne meclis-i şer‘-i şerîf-i şâmihü’l-erkân ve mahfil-i dîn-i münîf-i râsihü’l-bünyânda vakf-ı âti’t-tafsîle li-ecli’t-tescîl mütevellî nasb olunan fahrü’l-emsâl Muzaffer Bey b. Abdülmüteal nâm kimesne mahzarında asâleten ve vekâleten ikrâr ve takrîr-i kelâm edip vaktâ ki, âfitâb-ı ömrün zevâlin ve kârbân-ı vücûdun irtihâlin mülâhaza edip bu dünyâ-yı deniyyenin firîbine mağrûr olmayıp hazret-i rabbü’l-izzetden allet kelimetühû ve cellet azametuhû kendüye vâsıl olan atâyâ-yı celiyye ve mevâhib-i aliyyeyi “ve in te‘uddû ni‘metallâhi lâ-tuhsûhâ” vefkince hadd u adde imkân olmadığı ma‘lûm olup “mâ indeküm yenfadu ve mâ-indallâhi bâkin” mefhûm-ı şerîfi kalb-i latîfe münsâk olmağla inân-ı azîmeti hayrâta ma‘tûf ve semt-i meberrâta masrûf kılıp niyet-i hâlisa ve taviyet-i sâfiye ile ilâ-hîni sudûrı hâze’l-vakf ale’s-seviyye müşterek taht-ı tasarrufumuzda olup mahalle-i mezbûrede vâki‘ bir tarafı Hafize nâm hatun vakfı ve bir tarafı Asbî? nâm hatun vakfı ve iki tarafı tarîk-i âmma müntehî ulüvven ve süflen beyt-i müte‘addideyi müştemil mülk menzilimizi tebdîl ve tağyîr ve ihrâc ve idhâl yedimizde olmak üzere vakf ve habs edip evvelâ süknâsı hayâtda olduğumuzda kendi nesf-i nefîsemize, ba‘dehû her kangımız mukaddem vefât ederse hissesini hayâtda olanımız tasarruf ede, vefâtımızdan sonra evlâdımız ve evlâd-ı evlâdımız batnen ba‘de batnin mutasarrıf olalar, ba‘de’l-inkırâz benim hisseme utekām ve evlâd-ı utekām ve evlâd-ı evlâd-ı evlâd-ı utekām mutasarrıf olalar ve ba‘de’l-inkırâz îcâr olunup hâsıl olan icâresi Medîne-i Münevvere fukarâsına irsâl oluna ve müvekkilem mezbûrenin hissesine li-ebeveyn karındaşı Osman b. el-Hâc Himmet mutasarrıf ola [134b] ba‘dehû evlâdı ve evlâd-ı evlâdı karnen ba‘de karnin tasarruf edip ba‘dehüm müvekkilem mezbûrenin utekāsı ve evlâd-ı utekāsı ve evlâd-ı evlâd-ı utekāsı mutasarrıf olalar ve ba‘dehüm kezâlik îcâr olunup hâsıl olan gallesi fukarâ-i mersûmeye irsâl oluna ve hasbî tevliyyeti cümle meşrûtün-lehümden aslahına ola ve ahâlî-i mahalle-i mezbûre hasbî nâzır olup ve lâzım gelen imâret ve meremmetini nevbetinde sâkin olanlar edeler deyu menzil-i merkūmu mütevellî-i mezbûra teslîm eyledim, ol dahi kabz ve tesellüm eyledi dedikde mukırr-ı müşârun-ileyhi mütevellî-i mezbûr vicâhen tasdîk ve şifâhen tahkīk edip emr-i vakf tamâm oldukdan sonra mûmâ-ileyh Mehmed Ağa asâleten ve vekâleten kelâmını da‘vâ-yı rücû‘a sârif olup vakf-ı akār bi’l-ittifâk sahîh olup lâkin İmâm-ı A‘zam ve hümâm-ı efham sirâcü’l-ümmet muktedâyü’l-eimme Ebû Hanife Numan b. Sabit el-Kûfî -cüziye bi’l-hayr ve kufiye- mezheb-i sedîdlerinde sıhhat lüzûm ve te’bîdden ârî olmağın menzil-i mezkûru silk-i mülklerine idhâl murâd edip mütevellî-i mezbûrdan istirdâd edicek, mütevellî-i merkūm İmâmeyn-i hümâmeyn ve bedreyn-i tamâmeyn mezheb-i şerîflerinde sıhhat lüzûmu müstelzim olmağın vakf-ı mezbûrdan rücû‘ memnû‘ ve lüzûm-ı te’bîdi maktû‘dur deyu mukābele kılıp tevkī‘-i refî‘-i zîver-i sadr-ı kitâb olan hâkim-i hâsım-ı vâlâ-cenâb-ı fezâil-iktisâb ibkāhullâlu te‘âlâ fi’l-ahkâm mede’d-dühûr ve’l-ahkāb hazretlerine mürâfa‘a olduklarına hâkim-i hayyir-i habîr -sehhelellâhu aleyhi külle asîr- fikr-i dakīk ve teemmül-i hakīk buyurup cânib-i mütevellîde rüchân-ı kavî ve burhân-ı celî müşâhede edicek, zikr olunan menzilin ve zımnında olan kuyûd ve şurûtun sıhhat ve lüzûmuna ol iki imâm-ı celîlü’ş-şân ve kaviyyü’l-burhân re’y-i şerîfleri üzere hükm-i şer‘î ve kazâ-i mübrem-i mer‘î buyurup min-ba‘d vakf-ı merkūm vech-i ma‘lûm ve üslûb-ı mersûm üzere vakf sahîh ve lâzım olup nakz ve nakzına mecâl muhâl ve ibtâle zafer mümteni‘ü’l-ihtimâl oldu, “Fe-men beddelehû ba‘demâ semi‘ahû fe-innemâ ismühû ale’llezîne yübeddilûnehû innallâhe semî‘ün alîm” ve ecrü’l-vâkıfeyn ale’l-hayyi’l-cevâdi’l-kerîm, cerâ zâlik ve, Hurrire fî-gurreti Rebî‘i’l-âhir li-sene erba‘a ve selâsîn ve elf. Şühûdü’l-hâl: Zahrü’l-mevâliyi’l-izâm İbrahim Efendi el-kādî, kıdvetü’l-emâcid Süleyman Ağa Kethüdâ-yı Dârüssaâdet, Devâtdâr Mehmed Efendi Kâtib-i Defterhâne, Lütfi Efendi İmâm-ı mahalle, el-Hâc Mustafa el-müezzin, İbrahim Efendi b. Ahmed Muhâsebe-i Haremeyn, Devâtdârzâde Mustafa Ağa, Halil Efendi b. el-Hâc Memi el-kādî, Mehmed Efendi b. el-Hâc Memi el-kādî, Derviş Efendi b. Mehmed Kâtib-i Tersâne, Mehmed Efendi el-kādî, Bekir Efendi b. ( ) el-kādî, Mustafa Bey b. el-Hâc Memi el-yesârî, el-Hâc Bekir b. İsmail, el-Hâc İbrahim b. Hüseyin, Derviş Çavuş b. Hasan, el-Hâc Kenan Bey b. Abdullah, Receb Ağa b. ( ), Hudâverdi b. Mustafa er-râcil, Mahmud Beşe er-râcil, Abdi Çelebi b. ( ) er-râcil, Hamza b. İbrahim Bıçakçı, el-Hâc Cemşid Bey b. ( ) el-hammâmî ve gayruhüm.