Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 473 Hüküm no: 425 Orijinal metin no: [134b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa mahallesinden Hatice bt. Ahmed’in Havva bt. Mehmed’e açtığı arsa davasından feragat ederek zimmetini ibra etmesi Mahmiye-i İstanbul’da Hüseyin Ağa mahallesi sâkinelerinden Hadice bt. Ahmed nâm hatun tarafından husûs-ı âti’z-zikri ikrâra vekîl olup Mustafa Bey b. Yusuf ve Üstâd Hüseyin b. Abdullah nâm kimesneler şehâdetleriyle şer‘an vekâleti sâbite olan zevci Ali Bey b. Musa mahfil-i kazâda sâhibetü’l-kitâb Havvâ bt. Mehmed nâm hatun mahzarında ikrâr ve takrîr-i kelâm edip arsası Medîne-i Münevvere Vakfı’ndan olup mahmiyye-i mezbûrede el-Hâc Küçük mahallesinde vâki‘ ma‘lûmü’l-hudûd olup üç yüz elli iki zirâ‘ arsa üzerinde mebnî olup mezbûre Havvâ’nın tasarrufunda olan menzil mukaddemâ Mehmed Bey b. Ali nâm kimesnenin mülkü iken fevt oldukda sülüsü sulbiye kızı mezbûre Havvâ’ya ve sülüsânı sulbî oğlu olup kendüden sonra vefât eden Musa nâm kimesneye intikāl edip ba‘dehû mezkûr Musa dahi fevt oldukda sülüsân hisse sulbiye kızı Âişe’ye ve zevce-i metrûkesi müvekkilem merkūme Hadice’ye intikāl edip ba‘dehû mezbûre Âişe dahi fevt oldukda hissesi merkūme Havvâ ile müvekkilem merkūme Hadice’ye intikāl etmişdir deyu da‘vâ etmiş idim. El-hâletü hâzihî bundan akdem menzil-i mârru’z-zikrin atîk binâsı bi’l-külliye muhterik olmağla arsasından gayrı eser-i binâdan nesnesi bâkī kalmayıp hâlâ mecmû‘u on dokuz bin otuz beş akçeye tahmîn olunup müşâhede olunan binâ-i mezkûre Havvâ’nın mülkü idiği müvekkilem mezbûrenin ma‘lûmu olmağın zikr olunan da‘vâdan fâriğa olup zimmetini ibrâ etti dedikde gıbbe’t-tasdîk mâ-vaka‘a bi’t-taleb ketb olundu. Hurrire fî-evâili şehri Rebî‘i’l-âhir li-sene hamse ve selâsîn ve elf. Şühûdü’l-hâl: Mehmed Çelebi b. Mehmed, Durak Efendi el-imâm, Mehmed Halîfe b. ( ) el-müezzin ve gayruhüm.