Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 474 Hüküm no: 426 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirmasti mahallesinden Mustafa Bey b. Haydar’ın Haremeyn Vakfı’na ait mutasarrıf olduğu evi tamir ettirmesi Mahmiye-i İstanbul’da Kirmasti mahallesinde sâkin Mustafa Bey b. Haydar nâm kimesne meclis-i şer‘de takrîr-i kelâm edip mahalle-i mezbûrede vâki‘ olup Haremeyn-i Muhteremeyn Vakfı’ndan icâre-i mu‘accele ve müeccele ile mutasarrıf olduğum lede’l-ahâlî ma‘lûmü’l-hudûd menzilin bazı mevzi‘i müceddeden binâ ve bazı mevzi‘i meremmete muhtâc olmağla icâre-i mu‘acceleme mahsûb olmak üzere ma‘rifet-i mütevellî ve izn-i şer‘le bundan akdem binâ ve meremmet etmişimdir, cânib-i şer‘-i şerîfden üzerine varılıp harc u sarf ettiğim meblağın mertebe-i tahammülü tahmîn olunması matlûbumdur dedikde savb-ı şer‘-i mutahhardan Mevlânâ Ali Efendi ve hâssa mi‘mârlardan Üstâd Ali Çelebi b. Halil irsâl olunup anlar dahi zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile menzil-i mezbûra varıp nazar ve mesâha eylediklerinde tûlen ve arzen hesâb-ı şatrancî üzere otuz dört zirâ‘ kaygan döşeme abdesthâne ve dahlîzin her zirâ‘ı yüz beşer akçeden üç bin beş yüz yetmiş akçe ve hesâb-ı mezbûr üzere on beş zirâ‘ cedîd tahta perdenin her zirâ‘ı yirmi beşer akçeden üç yüz yetmiş beş akçe ve hesâb-ı mezbûr üzere dokuz zirâ‘ cedîd dahlîz sakfının her zirâ‘ı kırkar akçeden üç yüz altmış akçe ve bir cedîd nerdübân trabzan ve kepengi ile bin akçe ve şehnişînin hesâb-ı mezbûr üzere elli zirâ‘ beyâz ve siyâh sıvasının her zirâ‘ı onar akçeden beş yüz akçe ve ceviz tahtasından masnû‘ çerçefeli iki kıt‘a billûr pencere camının herbiri üçer yüz ellişer akçeden yedi yüz akçe ve iki kıt‘a duvar camının herbiri yüz ellişer akçeden üç yüz akçe ve bir cedîd oda kapısı çerçefesiyle üç yüz akçe ve tuğla ile mebnî bir cedîd ocak davlunbazı altı yüz akçe ve iki mücedded pencere demir ve çerçefesiyle bin iki yüz akçe ve hesâb-ı mezbûr üzere seksen bir zirâ‘ bir kebîr oda badanasının her zirâ‘ı üçer akçeden iki yüz kırk üç akçe ve ahırda iki demirli pencere yedi yüz akçe ve iki müceddeden mebnî kenîf üç kulaç kuyusu ile iki bin yedi yüz akçe ve ahır kapısı ve orta kapı meremmetine dört yüz akçe ve ceviz tahtasından masnû‘ bir mücedded sokak kapısı çer[çe]fesi ve bazı duvar meremmetiyle iki bin akçe ve bir kurnalı üstü mermer ile döşenmiş bir maslak yedi yüz akçe ve bir küçük sofa iki yüz elli akçe ve dâhiliyyesinde hesâb-ı mezbûr üzere on iki zirâ‘ tahta perdenin her zirâ‘ı on beşer akçeden yüz seksen akçe ve hesâb-ı mezbûr üzere elli altı zirâ‘ mıhlama trabzanın her zirâ‘ı otuzar akçeden bin altı yüz seksen akçe ve hesâb-ı mezbûr üzere seksen dört zirâ‘ kebîr oda badanasının her zirâ‘ı üçer akçeden iki yüz elli iki akçe ve hesâb-ı mezbûr üzere seksen sekiz zirâ‘ mücedded kaldırımın her zirâ‘ı ikişer akçeden bin elli altı akçe ve arşın taşı ile mebnî altı zirâ‘ taş nerdübânın her zirâ‘ı kırkar akçeden iki yüz kırk akçe ve su kuyusunun direkleri ve dolabı yüz elli akçe ve hesâb-ı mezbûr üzere otuz altı zirâ‘ tuğla döşemenin her zirâ‘ı on ikişer akçeden dört yüz otuz iki akçe ve dâhiliyye ve hâriciyyesinin hesâb-ı mezbûr üzere iki yüz zirâ‘ sakf ahtarmasının zirâ‘ı üçer akçeden altı yüz akçe ki cem‘an yirmi bin yüz seksen sekiz akçeye tahammülü vardır, noksân ile kābil değildir deyu mi‘mâr-ı mezbûr ve sâir ehl-i vukūf bi’l-ittifâk haber verdiklerinde mevlânâ-yı mezbûr mahallinde tahrîr, ba‘dehû gelip meclis-i şer‘de haber vermeğin mâ-vaka‘a bi’t-taleb ketb olundu. Tahrîren fî-evâhiri şehri Rebî‘i’l-âhir li-sene hamse ve selâsîn ve elf. Şühûdü’l-hâl: Mehmed Bey b. Gazanfer el-câbî, Mustafa b. Ali, Ali Çelebi b. Hızır el-câbî, Ali Bey b. Kasım el-cündî, İsmail Çelebi b. Mahmud el-câbî, Mustafa Çelebi b. Mehmed Kâtib-i vakf-ı mezbûr, Mustafa Çelebi b. Abdullah Kâtib-i vakf-ı mezbûr.