Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 475 Hüküm no: 427 Orijinal metin no: [135a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Ali’nin el-Hac Küçük mahallesinde Emine bt. İbrahim tarafından vakfedilmiş olan tasarrufundaki yanan evi kendi parasıyla yeniden yaptırması Mahrûsa-i İstanbul’da el-Hâc Küçük mahallesinde vâki‘ bennâ zirâ‘ıyla tûlen ve arzen bi-hesâb-ı şatrancî üç yüz elli iki zirâ‘ arsa ile üzerinde olan binâ merhûme sâhibetü’l-hayr Emine bt. İbrahim nâm Hatunun mülkü olmağla evvelâ nefsine, ba‘dehâ zevci Mehmed Bey b. Ali’ye, ba‘dehû evlâdına, ba‘dehüm gallesi Medîne-i Münevvere fukarâsına ve tevliyyet ve süknâsı meşrûtün-lehüm deyu şart-ı vakf ettikden sonra hâlâ menzil-i mevkūf-ı mezbûru ber-mûceb-i şart-ı vâkıfe mutasarrıfe olan Havvâ bt. Ali nâm hatun mahfil-i kazâda takrîr-i kelâm edip zikr olunan menzilin binâ-yı kadîmi târîh-i kitâbdan on yedi sene mukaddem muhterik olup bi’l-külliye nukzu mün‘adim olmağın mülküm olmak üzere kendi mâlımla müceddeden iki beyt-i süflî ve zulle ve kenîf ihdâs eylemişimdir, kıbel-i şer‘den üzerine varılıp hakīkat-i hâl ahâlî-i mahalleden suâl olundukdan sonra ihdâs ettiğim binânın mertebe-i tahammül ve arsa-i mevkūfe-i mezbûrenin ecr-i misli tahmîn olunması matlûbumdur dedikde savb-ı şer‘den Mevlânâ İbrahim Çelebi ve hâssa mi‘mârlardan Üstâd Muslı Çelebi b. Hüsam ve Hasan Çelebi b. Hüseyin ve Ali Çelebi b. Halil irsâl olunup anlar dahi zeyl-i kitâbda isimleri mastûr ebniye ve sukūfa vukūfu olan bî-garaz Müslimîn ile üzerine varıp nazar ve suâl eylediklerinde ahâlî-i mahalleden Abdurrahman b. Hüseyin ve Mehmed Çavuş b. Abdullah ve Ömer Reîs b. Ca‘fer nâm kimesneler fi’l-vâki‘ menzil-i mezbûr târîh-i merkūmda muhterik ve bi’l-külliye nıkzı mün‘adim oldukdan sonra hâlâ müşâhede olunan binâyı mezbûre Havvâ mülkü olmak üzere kendi mâlından ta‘mîrât eyledi deyu alâ-tarîkı’ş-şehâde haber verdiklerinden sonra zikr binâda vâki‘ tûlen ve kadden bi-hesâb-ı şatrancî yüz elli beş zirâ‘ dolma duvarın her zirâ‘ına otuz beşer akçeden beş bin dört yüz yirmi beş akçe ve hesâb-ı merkūm üzere yüz elli altı zirâ‘ sakfın her zirâ‘ına altmışar akçeden dokuz bin üç yüz altmış akçe [135b] ve hesâb-ı mersûm üzere yüz altı zirâ‘ taş duvarın her zirâ‘ına kırkar akçeden dört bin iki yüz kırk akçe cem‘an zikr olunan binânın on dokuz bin otuz beş akçeye ve zikri sebk eden arsa-i merkūme-i mersûmenin ecr-i misli yevmî ikişer akçeye tahammülü vardır deyu bi’l-ittifâk haber verdiklerinde mevlânâ-yı mezbûr mahallinde tahrîr ve ba‘dehû mahfil-i kazâda haber vermeğin mâ-vaka‘a bi’t-taleb ketb olundu. Hurrire fî-evâhiri şehri Rebî‘i’l-âhir li-sene hamse ve selâsîn ve elf. Şühûdü’l-hâl: Mustafa Bey b. Yusuf el-bevvâb, Durak Efendi b. ( ) el-imâm, Mehmed Halîfe b. ( ) el-müezzin, Mehmed Çelebi b. Mehmed.