Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 476 Hüküm no: 428 Orijinal metin no: [135b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa mahallesinden Ebubekir Çelebi b. es-Seyyid Abdurrahman’ın tamir ettirdiği ev vakfa ait olduğu anlaşıldığından masrafların iadesi Mahrûsa-i İstanbul’da Küçük Ayasofya kurbünde Hüseyin Ağa mahallesinde sâkin es-Seyyid Ebubekir Çelebi b. es-Seyyid Abdurrahman meclis-i şer‘de takrîr-i kelâm edip mahalle-i mezbûrede vâki‘ Ümmi Hatun bt. es-Seyyid Mehmed evvelâ nefsine, ba‘dehâ Medîne-i Münevvere fukarâsına vakf ve şart ettiği bir tarafı Şa‘ban Ağa b. ( ) mülkü ve bir tarafı Hamza Paşa Vakfı ve iki tarafı tarîk-i âmma müntehî hâriciyyesi fevkānî ve tahtânî üç bâb oda ve ahırı ve şehnişîni ve kenîfi ve dâhiliyyesi fevkānî ve tahtânî altı bâb oda ve bi’r-i mâ [ve] kenîfi müştemil olan menzil-i mezbûre Ümmi Hatun’un mülkü olup ba‘de vefâtihâ bi’l-inhisâr vârisi olduğum ecilden bana intikāl etti zu‘muyla menzil-i mezbûrda bir mikdâr binâ ihdâs eylemiş idim, hâlâ menzil-i merkūm Haremeyn fukarâsına vakf olduğu mübeyyen olmağın kıbel-i şer‘den üzerine varılıp harc u sarf ettiğim meblağın tahammülü tahmîn olundukdan sonra mütevellî-i vakf-ı mezbûrdan alıverilmesi matlûbumdur dedikde savb-ı şer‘den Mevlânâ Halil Efendi ve hâssa mi‘mârlardan Üstâd Ali Çelebi b. Halil irsâl olunup anlar dahi zeyl-i kitâbda isimleri mastûr olup ebniye ve sukūfa vukūfu olan Müslimîn ile menzil-i mezbûra varıp vakf-ı mezbûra bi’l-fi‘il mütevellî olan Ömer Bey b. Mustafa nâm cündînin mahzarında nazar ve mesâha ettiklerinde tûlen ve arzen hesâb-ı şatrancî üzere yüz otuz zirâ‘ taş duvarın her zirâ‘ı altmış akçeden yedi bin sekiz yüz akçe ve tuğla ile mebnî hesâb-ı mezbûr üzere altmış zirâ‘ dolma duvarın her zirâ‘ı kırkar akçeden iki bin dört yüz akçe ve hesâb-ı mezbûr üzere yüz yirmi zirâ‘ cedîd sakfın her zirâ‘ı kırkar akçeden dört bin sekiz yüz akçe cem‘an on beş bin akçeye tahammülü vardır, noksân ile kābil değildir deyu bi’l-ittifâk haber verdiklerinde mevlânâ-yı mezbûr mahallinde tahrîr, ba‘dehû mahfil-i kazâda haber verdikden sonra meblağ-ı mezbûru mezbûr Ebubekir Çelebi’ye edâ ve teslîme tenbîh birle mâ-vaka‘a bi’t-taleb ketb olundu. Tahrîren fî-evâili Şa‘bâni’l-mu‘azzam li-sene erba‘a ve selâsîn ve elf. Şühûdü’l-hâl: İbrahim Çelebi b. Ebîbekir el-mülâzım, Ali Efendi b. ( ) el-kādî, Mustafa Bey b. Yusuf el-bevvâb, Siyavuş b. Abdullah.