Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 477 Hüküm no: 429 Orijinal metin no: [135b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dizdâriye mahallesinden Hüsrev Çavuş b. Abdullah’ın vakfettiği ve Haremeyn Vakfı’na intikal eden evin başkasına kiraya verilmesi Haremeyn-i Muhteremeyn Vakfı’na bi’l-fi‘il mütevellî olan fahrü’l-akrân Ömer Bey b. Mustafa nâm cündî meclis-i şer‘-i şerîfde takrîr-i kelâm edip mahrûsa-i İstanbul’da Dizdâriye mahallesinde sâkin iken bundan akdem fevt olan sâhibü’l-hayrât Hüsrev Çavuş b. Abdullah hâl-i hayâtında silk-i mülkünde münselik olup mahalle-i mezbûrede vâki‘ bir tarafı Süleyman b. Abdullah el-Hayyât mülkü ve bir tarafdan Ahmed Bey b. ( ) Vakfı ve bir tarafdan vakf-ı mezbûr ve bir tarafı tarîk-i hâs ile mahdûd dâhiliyyesi fevkānî iki bâb beyti ve tahtânî iki bâb beyti ve bir fırını ve mahtab ve bir maslak yerini ve bir kenîf ve hadîkayı ve hâriciyyesi fevkānî altı bâb büyûtu ve bir tahta-pûş ve bir kenîfi müştemil menzili vakf ve habs edip süknâsını evvelâ kendi nefsine, ba‘dehû evlâdına, ba‘dehüm utekāsına, ba‘dehüm evlâd-ı utekāsına, ba‘de’l-inkirâz îcâr olunup hâsıl olan icâresi Medîne-i Münevvere fukarâsına deyu şart etmişdi, el-hâletü hâzihî meşrûtün-lehümden herbiri bi’l-külliye münkarız olmağla menzil-i mezbûr cânib-i vakf-ı mezbûra âid olmuşdur, kıbel-i şer‘-i şerîfden üzerine varılıp hakīkat-i hâl keşf ve tahrîr ve menzil-i mezbûr âhara îcâr olunmağa izin verilmesi matlûbumdur dedikde savb-ı şer‘-i mutahhardan Mevlânâ Halil Efendi ve hâssa mi‘mârlardan Üstâd Ali b. Halil irsâl olunup anlar dahi zeyl-i kitâbda isimleri mastûr Müslimîn ile menzil-i mezbûra varıp nazar ettiklerinde fi’l-vâki‘ hakīkat-i hâl mütevellî-i mezbûrun takrîrine muvâfık bulunduğunu mevlânâ-yı mezbûr mahallinde tahrîr, ba‘dehû meclis-i şer‘de haber vermeğin menzil-i mezbûru âhara îcâra izin birle mâ-vaka‘a bi’t-taleb ketb olundu. Tahrîren fî-evâili Zilhicceti’ş-şerîfe li-sene erba‘a ve selâsîn ve elf. Şühûdü’l-hâl: El-Hâc Hasan b. Mehmed, Mehmed b. Ramazan, Hüseyin b. Ramazan, Ahmed b. Mehmed, Ali b. Mustafa, Mustafa b. Himmet.