Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 478 Hüküm no: 430 Orijinal metin no: [135b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait el-Hac Büzürg mahallesindeki eve yanındaki arsanın ilhak olunması Haremeyn-i Muhteremeyn Vakfı’ndan olup mahmiyye-i İstanbul’da el-Hâc Büzürg mahallesinde vâki‘ ma‘lûmü’l-hudûd olan menzilin icâre-i mu‘accele ve ayda otuz akçe ücret-i müeccele ile müste’ciri olup sâbıkā hâssa arabacıbaşı olan fahrü’l-akrân ( ) nâm kimesne mahfil-i kazâda takrîr-i kelâm edip zikr olunan menzilin tarîk-i mahsûsu için mevzû‘a olup tûlen on iki ve arzen beş zirâ‘ hesâb-ı şatrancî üzere altmış zirâ‘ arsa memer olmayıp tenhâ yerde vâki‘ olmağın bazı eşkıyâ nâ-mahrem ile cem‘iyet edip fi‘il-i şenî‘den hâlî değildir, kıbel-i şer‘-i şerîfden üzerine varılıp icâre takdîr olundukdan sonra menzil-i mezbûra ilhâk olunması matlûbumdur dedikde savb-ı şer‘-i mutahhardan Mevlânâ Halil Efendi ve hâssa mi‘mârlardan Üstâd Hasan Çelebi b. Hüseyin ve Üstâd Ali Çelebi b. Halil irsâl olunup anlar dahi vakf-ı mezbûra bi’l-fi‘il mütevellî olan fahrü’l-akrân Ömer Ağa b. Mustafa ile menzil-i mezbûrun üzerine varıp nazar ve mesâha ettiklerinde fi’l-vâki‘ arsa-i mezbûre zikr olunan menzilin tarîk-i mahsûsu olup tenhâ yerde vâki‘ olmağla bazı eşkıyâ nâ-mahrem ile cem‘iyet edip fi‘il-i şenî‘den hâlî olmayıp böyle kaldığı takdîrce nice fesâda mü’eddâ olması mukarrerdir, lâkin arsa-i merkūme menzil-i merkūmeye ilhâk olunursa her vechile vakfa nâfi‘ ve vech-i muharrer üzere fi‘il-i şenî‘den hâlî olduğu mütehakkık ve ecr-i misl ayda beş akçe olup ândan ziyâdeye tahammülü olmadığı [136a] <> mütebeyyin olmağın mütevellî-i mezbûr arsa-i mezbûru menzil-i mârru’z-zikre ilhâk olunmak üzere ayda beş akçe icâre-i müeccele ile merkūma îcâr edip ol dahi [vech-i muharrer] üzere istîcâr ve [kabûl] ettiğini mevlânâ-yı mezbûr mahallinde tahrîr, ba‘dehû meclis-i şer‘de haber vermeğin mâ-vaka‘a gıbbe’t-taleb ketb u sebt olundu. Tahrîren fî-evâili şehri Rebî‘i’l-âhir sene hamse ve selâsîn ve elf mine’l-hicret. Şühûdü’l-hâl: Mehmed [b.] Nimetullah el-imâm, Bahtiyar b. Hüseyin el-müezzin, Mustafa b. Ca‘fer el-müezzin, Mehmed Çelebi b. Mustafa, Mustafa Çelebi b. Ali, Murad b. Ali, İsmail b. Ömer ve gayruhüm.