Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 479 Hüküm no: 431 Orijinal metin no: [136a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefeli mahallesinden Abdünnebî Hoca b. Abdullah’ın vefatıyla oturduğu Haremeyn Vakfı’na ait evin çocukları Mehmed ve Saliha’ya intikal etmesi Dârü’s-saltanati’s-seniyye Kostantıniyyetü’l-mahmiyye’de Kefeli mahallesi sâkinlerinden iken bundan akdem vefât eden merhûm Abdünnebî Hoca b. Abdullah’ın verâseti sulbî kebîr oğlu Mehmed’e ve sulbiye kebîre kızı Saliha’ya münhasır olduğu mütehakkık oldukdan sonra mezbûrân Mehmed ve Saliha tarafından menzil-i âti’z-zikri da‘vâ ve talebe vekîl olup Mehmed Beşe b. Ali ve Hasan Beşe b. Ali nâm kimesneler şehâdetleriyle şer‘an vekâleti sâbite olan Osman Bey b. Ali nâm kimesne mahfil-i kazâda Haremeyn Vakfı’na bi’l-fi‘il mütevellî olmağla menzil-i mezbûra vâzı‘ü’l-yed idiği tarîk-i şer‘î üzere sâbit olan Ömer Ağa b. Mustafa nâm kimesne mahzarında üzerine takrîr-i da‘vâ edip vakf-ı mezbûrdan olup mahalle-i mezbûrede vâki‘ iki tarafdan mahalle-i merkūme imâmına meşrût menzili ve iki tarafdan tarîk-i âm ile mahdûd iki beyt-i süflî ve bir kenîf ve muhavvatalı müştemil olan vakıf menzil dört bin akçe icâre-i mu‘accele ve yevmî bir akçe icâre-i müeccele ile mezbûr Abdünnebî Hoca’nın taht-ı tasarrufunda olmağla vefâtından sonra bi-hasebi’l-kanun tasarrufu müvekkillerim mezbûrâna intikāl etmiş iken hâlâ mütevellî merkūm bî-vech tasarruflarına mâni‘ olur, suâl olunup ihkāk-ı hak olunması matlûbumdur dedikde gıbbe’s-suâl mütevellî-i mezbûr cevâbında fi’l-vâki‘ menzil-i mezbûr vech-i muharrer üzerine müteveffâ-yı merkūm Abdünnebî Hoca’nın tasarrufunda olduğu vakfın ma‘mûlün-bih defterinde mastûr ve mukayyeddir, lâkin mezbûrân Mehmed ve Saliha müteveffâ-yı mezbûr Abdünnebî Hoca’nın evlâdı olduğu ecilden menzil-i sâbıku’t-tafsîlin tasarrufu müvekkilân-ı mezbûrâna intikāl idiği ma‘lûmum değildir deyu cevâb vericek, vekîl-i mezbûrdan takrîrine mutâbık beyyine taleb olundukda udûl-ı Müslimînden Yusuf Efendi b. Veli el-İmâm ve Hüseyin Efendi . ( ) el-İmâm ve Üveys b. Abdi ve Seyyid b. Habib nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûrân Mehmed ve Saliha müteveffâ-yı merkūm Abdünnebî Hoca’nın sulbî evlâdı olup menzil-i mezbûr vech-i âtî-i zikr müteveffâ-yı merkūmun tasarrufunda olmağla vefâtından sonra tasarrufu bi-hasebi’l-kanun mezbûrân Mehmed ve Saliha’ya intikāl eylemişdir, biz bu husûsa şâhidleriz, şehâdet dahi ederiz deyu edâ-i şehâdet-i şer‘iyye ettiklerinde gıbbe ri‘âyet-i şerâiti’l-kabûl şehâdetleri makbûle olmağın mûcebiyle amel birle mâ-vaka‘a bi’t-taleb ketb olundu, cerâ zâlik ve, Hurrire fî-evâili Cemâziyelâhir sene hamse ve selâsîn ve elf mine’l-hicret. Şühûdü’l-hâl: Mustafa Bey b. Yusuf el-bevvâbü’s-sultân, İbrahim Çelebi b. Bekir, Osman Efendi b. Mehmed, Kasım Çelebi b. Salih Efendi, Mehmed Bey b. Gazanfer, Ali Bey b. ( ), Ali Efendi b. ( ) el-kādî, Muzaffer Bey b. Abdullah ve gayruhüm mine’l-hâzırîn.