Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 480 Hüküm no: 432 Orijinal metin no: [136b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Raziye bt. İbrahim Bey’in Haremeyn Vakfı’na ait Daye Hatun mahallesindeki tasarrufunda olan evi tamir keşfi Fahrü’l-muhadderât zahrü’l-muvakkarât tâcü’l-mestûrât Raziye bt. İbrahim Bey nâm hatun meclis-i şer‘-i şerîfde takrîr-i kelâm edip Haremeyn-i Muhteremeyn Vakfı’ndan olup Dârü’s-saltanati’s-seniyye Kostantıniyyetü’l-mahmiye’de Tophane kurbünde Daye Hatun mahallesinde vâki‘ hudûdu ma‘lûm olmağla ta‘rîf ve tavsîfden müstağnî icâre-i mu‘accele ve müeccele ile tasarruf ettiğim menzilin bazı mevâzi‘i imârete ve bazı mevzi‘i meremmete muhtâc olmağın vech-i âtî üzere bundan akdem izn-i mütevellî ve ma‘rifet-i şer‘le icâre-i mu‘accele ve müecceleme mahsûb olmak üzere tecdîd ve meremmet etmişimdir, kıbel-i şer‘den üzerine varılıp harc u sarf ettiğim meblağın mertebe-i tahammülü tahmîn olunması matlûbumdur dedikde cânib-i şer‘-i kavîmden Mevlânâ İbrahim Çelebi b. Ebîbekir ve hâssa mi‘mârlardan Üstâd Hasan Çelebi b. Hüseyin ve Ali Çelebi b. Halil irsâl olunup anlar dahi vakf-ı mezbûra bi’l-fi‘il mütevellî olan Ömer Bey b. Mustafa ve sâir zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile zikr olunan menzilin üzerine varıp nazar ve mesâha ettiklerinde tûlen ve kadden bi-hesâb-ı şatrancî altı yüz bir zirâ‘ taş duvarın her zirâ‘ına [sek]sener akçeden kırk sekiz bin seksen akçe ve yine hesâb-ı mastûr üzere yüz doksan üç zirâ‘ dolma duvarın her zirâ‘ına ellişer akçeden dokuz bin altı yüz elli akçe ve yine hesâb-ı mezkûr üzere iki bin sekiz yüz zirâ‘ tavan boyamasının her zirâ‘ına on beşer akçeden kırk iki bin akçe ve yine hesâb-ı merkūm üzere yüz doksan zirâ‘ mücedded tavanın her zirâ‘ına ellişer akçeden dokuz bin beş yüz elli akçe ve yine hesâb-ı mastûr üzere üç bin yedi yüz zirâ‘ tahtası kireçli? sakf aktarmasının her zirâ‘ına altışar akçeden yirmi iki bin iki yüz akçe ve yine vech-i mezbûr üzere on sekiz aded penceresine dört bin yüz akçe ve bir köşküne dört bin yedi yüz akçe ve bir kubbe tavan meremmetine iki bin akçe ve altı aded kapısına iki bin iki yüz akçe ve bir mücedded ocağa iki bin beş yüz akçe ve iki kenîf kuyusu ile iki bin yedi yüz akçe ve yine hesâb-ı mezkûr üzere yüz doksan sekiz zirâ‘ tuğla döşemenin her zirâ‘ına kırkar akçeden yedi bin beş yüz altmış akçe ve on yedi aded hâne camlarına dört bin dört yüz akçe ve iki dolabına bir masandrasına üç bin akçe ve iki boy bir taş nerdübânına trabzanı ve sahanı ile altı bin akçe ve yine vech-i mezkûr üzere yüz seksen bir zirâ‘ tahta perdenin zirâ‘ına kırk beşer akçeden sekiz bin yüz kırk beş akçe ve hamâm kurbünde vâki‘ bir kenîf iki bin beş yüz akçe ve iç masandra boyasına bin iki yüz akçe ve sekiz aded kebîr direğe başlıkları ile dört bin akçe ve hâriciyye ve dâhiliyyede vâki‘ trabzan ve direk boyasına beş bin yüz yirmi beş akçe ve bir abdesthânesine iki bin akçe ve bir serîre trabzanı ile iki bin beş yüz akçe ve bir zerâk? ve çifte yedi yüz kırk akçe ve on iki aded dolabına altı bin akçe ve hâriciyye ve dâhiliyyesinde vâki‘ bahçe trabzanlarına boyasıyla beş bin altı yüz akçe ve bir sofasına trabzanı ile bin iki yüz akçe ve yine hesâb-ı mezbûr üzere beş yüz altmış dokuz zirâ‘ kaldırımın her zirâ‘ı on dörder akçeden yedi bin dokuz yüz altmış altı akçe ve hamâm mücedded kazganına yedi bin sekiz yüz otuz akçe ve mücevvef hamâm tuğlasına bin beş yüz akçe ve dört aded hamâm kapısına beş yüz yirmi akçe ve kırk (…) sekiz zirâ‘ kârîz tathîrine üç bin sekiz yüz akçe ve yirmi bir zirâ‘ cedîd kârîze beş bin altı yüz akçe ve iki kemerli ve bir sâde maslağa altı bin beş yüz akçe ve iki yüz kırk vakiyye kurşununa beş bin iki yüz seksen akçe ve otuz beş aded hamâm camına beş yüz yirmi beş akçe ve hâriceyi ve dâhiliyyesinde vâki‘ odalar hamâmın sıva ve âteşîsine iki bin yüz kırk akçe ve badanasına beş bin akçe ve mevâzi‘-i müte‘addidede kurşun oluklarına ve pencere demirlerinin boyasına beş bin akçe ve yirmi iki aded billûr camlarına on bir bin akçe ve sekiz aded cam duvarına üç bin akçe ve iki oturak tahtasına beş yüz akçe ve yirmi dokuz aded at yemliğine üç bin akçe ve bir aded şehnişîne beş bin akçe ve bir munakkaş perde ve kafese iki bin yüz akçe ve perâkende meremmâtına yirmi beş bin akçe cem‘an üç yüz on bin dokuz yüz on bir akçeye tahammülü vardır, bundan noksânla olmak mümkün değildir deyu bi’l-ittifâk haber verdiklerin mevlânâ-yı mezbûr mahallinde tahrîr ve ba‘dehû mahfil-i kazâda alâ-vukū‘ihî ihbâr etmeğin mâ-vaka‘a bi’t-taleb ketb olundu, [cerâ] zâlike ve, Hurrire fî-Cemâziyelevvel sene hamse ve selâsîn ve elf min-hicreti men lehü’l-izzü [ve]’l-mecdü ve’ş-şeref. Şühûdü’l-hâl: El-Hâc Osman b. Abdullah, Osman Ağa b. Rüstem, el-Hâc Mustafa b. Abdullah, Mustafa Çelebi b. Hüsrev, Mustafa Çelebi b. Abdülmennan, Ramazan b. Hüdaverdi, Mehmed Bey b. Gazanfer, İsmail Çelebi b. Mahmud, Ali Çelebi b. Mehmed el-câbî, Mustafa b. Yusuf el-bevvâb, Ahmed Çavuş b. Abdullah ve gayruhüm.