Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 481 Hüküm no: 433 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na intikal eden Kalenderhane mahallesindeki evin Süleyman Ağa b. Abdüddâim’e kiraya verilmesi Zümre-i sipâh-ı muzaffer-penâhdan olup Haremeyn-i Şerîfeyn Vakfı’na bi’l-fi‘il mütevellî olan fahrü’l-akrân Ömer Ağa b. Mustafa mahfil-i kazâda atebe-i aliyye müteferrikalarından kıdvetü’l-e‘âlî ve’l-e‘âzim Süleyman Ağa b. Abdüddâim nâm kimesne mahzarında ikrâr ve takrîr-i kelâm edip mahmiye-i mezbûrede Kalenderhane mahallesinde vâki‘ bir tarafdan Mehmed Subaşı mülkü ve bir tarafı yine mezbûr Süleyman Ağa mülkü ve iki tarafı tarîk-i âm ile mahdûd ve mümtâz olup muhavvata-i hâriciyyesinin tabaka-i ûlâsında bir ahır ve sekiz bâb dükkân ve tabaka-i sâniyesinde iki oda ve bir matbah ve bir kenîf ve tabaka-i sâlisesinde iki bâb oda ve bir kenîf ve muhavvata-i dâhiliyyesinin yine tabaka-i ûlâsında bir mahzen ve kîlâr ve bir matbah ve bir hamâm ve iki su kuyusu ve bir kenîf ve tabaka-i sâniyesinde dört bâb oda ve bir şehnişîn ve tabaka-i sâlisesinde iki bâb oda ve bir şehnişîn ve bir kenîfi müştemil olup beher sene mahmiye-i merkūmede Kalenderhane Vakfı’na üç bin altı yüz akçe mukāta‘ası olan menzilin bundan akdem ber-vech-i iştirâk mâlikleri olan Davud Ağa nâm kimesne ile zevcesi Saliha bt. Abdullah nâm hatun menzil-i mezbûru hasbeten lillâh vakf ve habs ettiklerinden sonra süknâsını evvelâ kendi nefislerine ve her kangısı mukaddem vefât ederse hissesini âharı mutasarrıf ola ve ba‘dehümâ her birinin evlâdına ve ba‘dehüm gallesi Medîne-i Münevvere fukarâsına ve tasarrufu Haremeyn mütevellîsine deyu şart etmişler idi, lâkin mezbûr Davud Ağa bilâ-veled mukaddem vefât etmekle ber-mûceb-i şart-ı vâkıf cümlesinin tasarrufu merkūme Saliha’ya intikāl ettikden sonra kendünün süknâya ihtiyâcı olmamağın menzil-i mezkûru Haremeyn’e teslîm edip ben dahi tevliyetim hasebiyle kabz ve tesellüm ve sâir evkāf-ı Haremeyn’e ilhâk etmişdim. El-hâletü hâzihî menzil-i mârru’z-zikr icâre-i müeccele ile îcâr olunduğu takdîrce îrâdı masrafına ve dahli harcına vefâ etmediği emr-i mukarrerdir, lâkin vech-i âtî üzere îcâr olunması vakfa enfa‘ ve evlâ olduğu mütehakkık olmağın müzâyede olunup ragabât-ı nâs münkatı‘a oldukdan sonra ancak râyic fi’l-vakt iki yüz kırk bin akçe icâre-i müeccele [mu‘accele] ve senevî iki bin yüz altmış akçe ücret-i müeccele ile mûmâ-ileyh Süleyman Ağa üzerinde karâr edip ziyâde ile tâlib-i âhar olmayacak, ben dahi menzil-i mezbûru iki yüz kırk bin akçe ücret-i mu‘accele ve senevî iki bin yüz altmış akçe ücret-i müeccele ile müşârun-ileyh Süleyman Ağa’ya îcâr edip ol dahi vech-i muharrer üzere istîcâr ve kabûl ettikden sonra meblağ-ı mezbûrun kâmil bin guruşun hâlâ yedinden alıp kabz edip bâkī kalan mezbûrü’n-na‘t yüz altmış bin akçesin kıbel-i şer‘-i kavîmden tahmîn ve takvîm olduğu üzere mûmâ-ileyh Süleyman Ağa mukaddemâ menzil-i merkūma mesfûre Saliha izin ve ma‘rifetiyle icâre-i mu‘accelesine mahsûb olmak üzere imâret ve meremmetine harc u sarf ettiği yine yüz altmış bin akçeye mahsûb olundukdan sonra hâlâ ecr-i mislini tekmîl için nakid verdiği zikri sebk eden bin kıt‘a guruş ile icâre-i mu‘accele nâmına mersûm Süleyman Ağa’nın menzil-i mezbûrda iki yüz kırk bin akçesi vardır, ba‘de’l-yevm imâret ve meremmetine kendi mâlından sarf ettiği akçe icâre-i mu‘accelesine mahsûb olmak üzere istediği gibi binâya ve keyfe mâ yeşâ tasarrufa izin verdim, âhar kimesne mâni‘ ve müzâhim olmaya dedikde gıbbe’t-tasdîk mâ-vaka‘a bi’t-taleb ketb olundu. Fî-evâsıtı Cemâziyelâhir li-sene hamse ve selâsîn ve elf. Şühûdü’l-hâl: Hüseyin Efendi b. Mehmed el-imâm, Abdünnebî b. Siyami, Ömer Çavuş b. Mustafa, Mehmed Çelebi b. Abdi, Hasan Çelebi b. Hüseyin, Mehmed Bey b. Abdullah el-Cündî.