Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 483 Hüküm no: 434 Orijinal metin no: [137a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalenderhane mahallesinden Saliha bt. Abdullah’ın kendi tasarrufundaki vakıf evi Haremeyn Vakfı mütevellisine teslim etmesi Dârü’s-saltanati’s-seniyye mahmiye-i Kostantıniyye’de Kalenderhane mahallesi sâkinlerinden fahrü’l-muhadderât Saliha bt. Abdullah nâm hatun mahfil-i kazâda Haremeyn Vakfı’na bi’l-fi‘il [mütevellî] olan Ömer Bey b. Mustafa el-Cündî mahzarında ikrâr ve takrîr-i kelâm edip mahalle-i mezbûrede vâki‘ iki tarafı tarîk-i âm ve bir tarafı Mehmed Subaşı mülkü ve bir tarafı Süleyman Ağa mülkü ile mahdûd olup muhavvata-i hâriciyyesinin tabaka-i ûlâsında bir ahır ve sekiz bâb dükkân ve tabaka-i sâniyesinde iki bâb oda ve bir matbah ve bir kenîf ve tabaka-i sâlisesinde iki bâb oda ve kenîf ve muhavvata-i dâhiliyyesinin tabaka-i ûlâsında bir mahzen ve bir kîlâr ve bir matbah ve bir hamâm ve iki bi’r-i mâ ve bir kenîf ve tabaka-i sâniyesinde dört bâb oda ve bir şehnişîn ve tabaka-i sâlisesinde iki bâb oda ve bir kenîfi müştemil olup senevî Kalenderhane Vakfı’na üç bin altı yüz akçe mukāta‘ası olan menzilin nısfı benim ve nısf-ı âharı zevcim olup mukaddemâ vefât eden Davud Ağa nâm kimesnenin iken hasbeten lillâhi vakf ve habs edip tevliyyet ve süknâsın evvelâ kendi nefsimize ve her kangımız mukaddem vefât ederse hissesine âhar mutasarrıf ola ve ba‘dehümâ herbirimizin evlâdına ve ba‘dehüm gallesi Medîne fukarâsına ve tasarrufu Haremeyn mütevellîsine deyu şart etmişdik, lâkin zevcim mezbûr Davud Ağa bilâ-veled mukaddem vefât etmekle ber-mûceb-i şart-ı vâkıf cümlesinin tasarrufu bana [intikāl] ettikden sonra benim dahi süknâya ihtiyâcım olmamağın mütevellîsi yediyle îcâr olunup hâsıl olan gallesi her sene Medîne-i Münevvere fukarâsına îsâl olunmak üzere menzil-i mezbûru mütevellî-i mûmâ-ileyhe teslîm eyledim dedikde gıbbe’t-tasdîk mâ-vaka‘a bi’t-taleb ketb olundu. Hurrire fî-evâsıtı Cemâziyelâhir li-seneti’l-mezbûre. Şühûdü’l-hâl: es-Sâbıkūn.