Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 483 Hüküm no: 435 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalenderhane mahallesinde Davud Ağa ile hanımı Saliha tarafından vakfedilen evde kiracı olan Süleyman Ağa b. Abdüddâim’in evi tamir keşfi Dârü’s-saltanati’s-seniyye Kostantıniyyetü’l-mahmiyede Kalenderhane mahallesi sâkinlerinden bâ‘isü’l-kitâb kıdvetü’l-emâcid ve’l-ekârim Süleyman Ağa b. Abdüddâim nâm kimesne mahfil-i kazâda takrîr-i kelâm edip mahalle-i mezbûrede vâki‘ iki tarafı tarîk-i âm ve bir tarafı Mehmed Subaşı mülkü ve bir tarafı benim mülkümle mahdûd olan hâriciyye ve dâhiliyyesinde büyût-ı müte‘addideyi müştemil olan menzilin nısfı merhûm Davud Ağa’nın ve nısf-ı âharı zevcesi Saliha bt. Abdullah nâm Hatunun mülkü iken bundan akdem herbiri vakf ve habs ettiklerinden sonra tevliyyet ve süknâsın evvelâ nefislerine ve her kangısı mukaddem vefât ederse hissesine âhar mutasarrıf ola ve ba‘dehümâ herbirinin evlâdına ve ba‘dehüm gallesi Medîne-i Münevvere fukarâsına deyu şart eylemişler idi, lâkin mezbûr Davud Ağa bilâ-veled mukaddem vefât etmekle menzil-i mezbûrun tasarrufu bi’l-külliye mezbûre Saliha’ya intikāl ettikden sonra mürûr-ı eyyâm ile ekser mevâzi‘i harâb olmağın bundan akdem kendi mâlımla mülküm olmak üzere binâ-yı vakfa mezbûre Saliha bana izin verdiği ecilden ben dahi vech-i muharrer üzere kendi mâlımla bazı yerini tecdîd ve bazı mahallin ta‘mîr etmişimdir, kıbel-i şer‘-i şerîfden üzerine varılıp harc u sarf ettiğim meblağın mertebe-i tahammülü tahmîn olunması matlûbumdur dedikde savb-ı şer‘-i mutahhardan Mevlânâ İbrahim Çelebi b. Ebîbekir ve hâssa mi‘mârlardan Üstâd Hasan Çelebi b. Hüseyin ve Ali Çelebi b. Halil irsâl olunup anlar dahi zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile menzil-i mezbûrun üzerine varıp nazar ve mesâha ettiklerinde fi’l-vâki‘ tûlen ve kadden hesâb-ı şatrancî üzere yüz doksan zirâ‘ mücedded kârgîr duvarın her zirâ‘ına yüz yirmişer akçeden yirmi iki bin sekiz yüz akçe ve yine hesâb-ı mezbûr üzere iki yüz on dört zirâ‘ mücedded dolma duvarın her zirâ‘ına ellişer akçeden on bin yedi yüz akçe ve yine hesâb-ı mezbûr [üzere] yüz altmış altı zirâ‘ tavanın her zirâ‘ına ellişer akçeden sekiz bin [üç] yüz akçe ve yine hesâb-ı mezbûr üzere iki yüz doksan altı zirâ‘ tahta perdenin her zirâ‘ına kırk beşer akçeden on bir [üç] bin üç yüz yirmi akçe ve yine hesâb-ı mezbûr üzere yüz elli altı zirâ‘ tuğla döşemenin her zirâ‘ına kırkar akçeden altı bin iki yüz kırk akçe ve yine hesâb-ı mezkûr üzere yüz kırk zirâ‘ sakfın her zirâ‘ına ellişer akçe ve yine hesâb-ı mezbûr üzere bin zirâ‘ sakfın mahbâsına ve câbecâ kiremidlerine altı bin akçe ve iki masandrasına ve dolablarına altı bin dört yüz akçe ve mücedded münakkaş ocağına bin iki yüz akçe ve bir câmeşûyhânesine bin beş yüz akçe ve yirmi dört penceresine beş bin kırk akçe ve bir kenîfe bin iki yüz akçe ve beş aded kebîr direklerine iki bin akçe ve yirmi beş aded senge iki bin beş yüz akçe ve yedi demirli penceresine altı bin üç yüz akçe ve on beş aded şeşhâne camlarına dört bin beş yüz akçe ve hamâm sakfında vâki‘ yirmi tahta kurşununa sekiz bin akçe ve altmış yedi zirâ‘ kurşun borusuna altı bin üç yüz atmış akçe ve elli altı zirâ‘ ocak dîvânına altı bin yedi yüz yirmi akçe ve yirmi üç zirâ‘ kârgîr kemerin her zirâ‘ına yüz yirmişer akçeden iki bin yedi yüz altmış akçe ve yine hesâb-ı mastûr üzere iki yüz yirmi zirâ‘ saçağın her zirâ‘ına on beşer akçeden üç bin üç yüz akçe ve yirmi dokuz aded hamâm camlarına sekiz yüz altmış akçe ve bu cümleden gayrı vakf-ı mezbûr izin ve ilminden mâ‘adâ müfredât-ı defter mûcebince yirmi senede bazen müşâhed ve bazen müteferrik olmağla müşâhed perâkende meremmeti nâmına yirmi yedi bin akçe cem‘an vech-i muharrer üzere mezbûr Süleyman Ağa’nın menzil-i mezkûrda evvelâ binâsıyla meremmeti yüz altmış bin akçe ile ancak olur, bundan noksân ile kābil değildir deyu ittifâk ettiklerin ve mezbûr[e] Saliha dahi ol meclis[de] vech-i mübeyyen üzere menzil-i mezbûre mülkü olmak üzere mezbûr Süleyman Ağa’ya kendi mâlından imâret ve meremmetine harc u sarfa izin verdiğin mukırre olmağın mevlânâ-yı mezbûr mahallinde tahrîr, ba‘dehû meclis-i şer‘de vukū‘u üzere inhâ edicek, mâ-vaka‘a bi’t-taleb ketb ü sebt olundu. Tahrîren fî-evsatı Cemâziyelâhire sene hamse ve selâsîn ve elf. Şühûdü’l-hâl: Ali Efendi el-kādî, Mehmed Çelebi b. Abdullah, Osman Efendi b. Mehmed, Mustafa Bey b. Yusuf, Siyavuş b. Abdullah ve gayruhüm.