Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 485 Hüküm no: 436 Orijinal metin no: [138a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çivizâde mahallesinde Çadırcı Hüseyin tarafından vakfedilip Haremeyn Vakfı’na intikal eden evin Hüseyin Bey b. Piyale’ye kiraya verilmesi Zümre-i sipâh-ı muzaffer-penâhdan olup mahrûsa-i İstanbul’da Haremeyn Vakfı’na bi’l-fi‘il mütevellî olan Ömer Bey b. Mustafa mahfil-i kazâda zümre-i mezbûreden işbu râfi‘ü’l-kitâb Hüseyin Bey b. Piyale nâm cündî mahzarında ikrâr ve takrîr-i kelâm edip sâhibü’l-hayrât merhûm Çadırcı Hüseyin nâm kimesne hayâtında mahrûsa-i merkūmede Davud Paşa nâm mevzi‘ kurbünde Çivizâde mahallesinde vâki‘ bir tarafı mahalle-i mezbûre imâm ve müezzinine meşrût vakıf menzille ve bir tarafı Ali Beşe nâm kimesne mülküyle ve bir tarafı mahalle mescidiyle ve bir tarafı tarîk-i âm ile mahdûd olup bir ahırı ve üstünde bir bâb beyti ve iki tahtânî beyti ve sofayı ve bi’r-i mâ ve cüneyneyi ve kenîfi müştemil olan mülk menzilini hasbeten lillâhi te‘âlâ vakf ve habs ettiğinden sonra süknâsını hayâtda oldukça kendi nefsine, ba‘dehû gallesi Haremeyn fukarâsına deyu şart etmişdi, el-hâletü hâzihî ber-mûceb-i şart-ı vâkıf kendi vefâtından sonra menzil-i mezbûrun tasarrufu Haremeyn’e intikāl ettikde vech-i âtî üzere îcâr olunması lâzım gelmeğin müzâyede olunup ragabât-ı nâs münkatı‘ oldukdan sonra râyic fi’l-vakt on bin akçede mezbûr Hüseyin Bey üzerinde karâr edip ziyâde ile tâlib-i âhar zuhûr etmeyip meblağ-ı mesfûr ecr-i misli idiği mukarrer olmağın ben dahi tevliyetim hasebi ile zikr olunan menzili on bin akçe icâre-i mu‘accele ve yevmî bir akçe ücret-i müeccele ile mezkûr Hüseyin Bey’e îcâr edip ol dahi vech-i muharrer üzere istîcâr ve kabûl ettikden sonra meblağ-ı merkūmu bi’t-tamâm yedinden alıp kabz eyledim dedikde gıbbe’t-tasdîk mâ-vaka‘a bi’t-taleb ketb olundu. Hurrire fî-evâsıtı Cemâziyelâhire li-sene hamse ve selâsîn ve elf. Şühûdü’l-hâl: Ali Beşe b. ( ), Hüseyin Subaşı b. ( ), Mustafa Çelebi b. ( ) el-yesârî, Ömer Halîfe el-müezzin.