Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 485 Hüküm no: 437 Orijinal metin no: [138a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa Kurd Çelebi mahallesinden Kurd Kaptan b. Mustafa Kaptan’ın Haremeyn Vakfı’na ait tasarrufundaki bostanın duvarını tamir ettirmesi Mahmiye-i Galata hâricinde kasaba-i Kasım Paşa mahallâtından Kurd Çelebi mahallesinde sâkin fahrü’l-akrân Kurd Kapudan b. Mustafa Kapudan meclis-i şer‘de takrîr-i kelâm edip Haremeyn-i Muhteremeyn Vakfı’ndan olup kasaba-i mezbûrede Tahtakadı mahallesinde vâki‘ lede’l-ahâlî ma‘lûmü’l-hudûd büyût-ı müte‘addideyi ve bi’r-i mâyı müştemil icâre-i mu‘accele ve müeccele ile taht-ı icâremde olan bostanın duvarları harâb olmağla bazı mevâzi‘i müceddeden ebnâya ve bazı mevâzi‘i meremmete muhtâc olmağla icâre-i mu‘acceleme mahsûb olmak üzere kıbel-i şer‘den me’zûnen ma‘rifet-i mütevellî ve kendi mâlım ile bundan akdem binâ ve meremmet etmişimdir, cânib-i şer‘-i şerîfden üzerine varılıp harc u sarf ettiğim meblağın mertebe-i tahammülü tahmîn olunması matlûbumdur dedikde savb-ı şer‘-i mutahhardan Mevlânâ Ali Efendi ve hâssa mi‘mârlardan Üstâd Ali Çelebi b. Halil irsâl olunup anlar dahi zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile zikr olunan bostana varıp vakf-ı mezbûra bi’l-fi‘il mütevellî olan Ömer Bey b. Mustafa mahzarında nazar ve mesâha eylediklerinde tûlen ve kadden hesâb-ı şatrancî üzere üç yüz altmış zirâ‘ mücedded taş duvarın her zirâ‘ı ellişer akçeden on sekiz bin akçe ve doksan zirâ‘ mücedded duvar sakfının her zirâ‘ı ellişer akçeden dört bin beş yüz akçe ve iki yüz elli zirâ‘ müceddeden mebnî tahta havlunun her zirâ‘ı altmışar akçeden on iki [beş] bin akçe müceddeden mebnî kameriye on üç bin akçe ve müceddeden mebnî iki yüz elli zirâ‘ asma çardağın her zirâ‘ı ellişer akçeden on iki bin beş yüz akçe ve duvar kapısı, duvar ve dolabını tecdîde yirmi bin akçe ve zikr olunan bostanda vâki‘ suyu bostan hâricine icrâ için künk ve sâir levâzımına on bin akçe ve büyût-ı müte‘addidenin bazı duvar ve havlularını meremmet ve sakfını ahtarmağa on bin akçe ki cem‘an yüz bin akçeye tahammülü vardır, bundan noksân ile kābil değildir deyu mi‘mâr-ı mezbûr ve sâir ehl-i vukūf bi’l-ittifâk haber verdiklerinde mevlânâ-yı mezbûr mahallinde tahrîr ba‘dehû meclis-i şer‘de heber vermeğin mâ-vaka‘a bi’t-taleb ketb olundu. Tahrîren fî-evâhiri Cemâziyelâhire li-sene hamse ve selâsîn ve elf. Şühûdü’l-hâl: Mustafa Kapudan b. Abdülmennan, Kırımî Kapudan b. Abdurrahman, el-Hâc Mehmed b. Hasan er-reîsü’s-sultân, Osman Kapudan eş-şehîr bi-Taşçızâde, Hasan Ağa er-reîsü’s-sultânî.