Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 486 Hüküm no: 438 Orijinal metin no: [138b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Ağa Vakfı’na ait evin kiracısı olan İlya v. Yahuda’nın kiranın yeni rayic üzere yeniden hesaplanmasını istemesi Haremeyn-i Muhteremeyn Evkāfı nâzırı olup atebe-i aliyyede hâlâ Dârüssaâdeti’ş-şerîfe ağası olan iftihârü’l-havâs ve’l-mukarrebîn muhtâru ashâbi’l-izzi ve’t-temkîn mu‘temedü’l-mülûk ve’s-selâtîn enîsü’l-hazreti’l-aliyyeti’l-hâkāniye celîsü’l-âdeti’s-seniyyeti’l-sermediye zü’l-kadri’r-refî‘ ve’l-câhi’l-menî‘ el-mahfûfu bi-sunûfi avâtifi’l-meliki’l-kerîm İdris Ağa b. Abdurrahim huzûrunda akd-i meclis olundukdan sonra sâye-i nezâretlerinde olan evkāfdan olup mahrûsa-i İstanbul’da merhûm Abbas Ağa Vakfı’ndan Şühudkapısı dâhilinde vâki‘ menzil-i âti’t-tefâsîlin hâlâ müste’ciri olan râfi‘ü’l-kitâb İlya v. Yahuda nâm Yahudi meclis-i şer‘-i şerîfde takrîr-i kelâm edip vakf-ı mezbûrdan mevzi‘-i mezkûrda vâki‘ lede’l-ahâlî ve’l-cîrân hudûdu ma‘lûm üç tabakada büyût-ı müte‘addideyi müştemil olup altın yüz yetmişe râyic iken üç yüz on bin akçeye iştirâ olunmağın yevmî elli akçe icâre-i müeccele takdîr olunmağla taht-ı icâremde menzil-i mezbûrun hâlâ altın yüz yirmi akçeye tenzîl olundukda altın hesâbınca icâresi ecr-i mislinden zâiddir, kıbel-i şer‘den üzerine varılıp yedimde olan fetvâ-yı şerîfe nazar [ve] mûcebince icâre takdîr olunması matlûbumdur deyu sultânü’l-ulemâi’l-a‘lâm hâlâ şeyhülislâm ve müfti’l-enâm hazretlerinden ibrâz olunmuş fetvâ-yı sahîha-i şer‘iyyesine nazar olundukda Zeyd altın yüz yetmişe râyic iken üç yüz on bin akçeye İlya’dan iştirâ ettiği menzili vakf edip yine altın yüz yetmiş akçe yevmî ellişer akçeye İlya’ya îcâr ettikden sonra cedîd ceyyid akçe zuhûr edip altın yüz yirmi akçeye tenzîl oldukda hâlâ mütevellîsi Amr yüz yirmi akçe bir altın olmak üzere İlya’dan yevmî ellişer akçe icâre taleb ve ahza kādir olur mu?, el-cevâb olmaz, ecr-i misliyle îcâr olunup altın hesâbınca icâresin alır deyu buyurulmağın ağa-yı müşârun-ileyh ma‘rifetiyle savb-ı şer‘den umdetü’l-müderrisîni’l-kirâm Mevlânâ Abdurrahman Efendi ve hâssa mi‘mârlarından Üstâd Hasan Çelebi b. Hüseyin ve mütevellî olan Mehmed Çelebi nâm bevvâbü’s-sultânî irsâl olunup anlar dahi ebniye ve sukūfa vukūfu olan bî-garaz Müslimîn ile üzerine varıp vakf-ı mezbûra bi’l-fi‘il mütevellî olan umdetü’l-a‘yân İdris Ağa b. Abdürrahim nâm kimesne mahzarında mu‘âyene ve müşâhede ettiklerinde fi’l-vâki‘ menzil-i mezbûrun tabaka-i ûlâsında olan beş bâb oda ve bir matbahın ve yine anlara muttasıl ulvî ve süflî iki oda ve bir matbahın ve tabaka-i sâniyesinde beş bâb oda ve bir matbahın ve tabaka-i sâlisesinde üç bâb oda ve bir matbahın altın yüz yirmi akçe olmak üzere olan icâresi ecr-i mislinden zâiddir, hâlâ hesâb-ı mesfûr üzere ecr-i misli ancak otuz beşer akçedir, ândan ziyâdeye tahammülü olmayıp lâkin ecr-i misli olan meblağ-ı mezbûrdan iki akçesi kârîzi merhûm ( ) Vakfı arsasından olmağla beher sene ikişer yüz kırkar akçe mukāta‘asına ve zikr olunan kârîzin âhar kârîze ittisâli olmağın ekser zamân tutulup açmasına ve sâir meremmet-i cüz’iyesine harc için altından bâkī kalan otuz üç akçesi vakfa kâfî ve vech-i muharrer üzere ecr-i mislidir deyu bi’l-ittifâk haber verdiklerinde mevlânâ-yı mezbûr mahallinde tahrîr ve ba‘dehû alâ-vukū‘ihî inhâ etmeğin mâ-vaka‘a bi’t-taleb ketb olundu. Hurrire fî-evâili Recebi’l-ferd li-sene hamse ve selâsîn ve elf. Şühûdü’l-hâl: İbrahim Çelebi b. Ebîbekir, Halil Efendi b. Mahmud, Mustafa Bey b. Yusuf, Zülfikār b. Pîrî.