Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 487 Hüküm no: 439 Orijinal metin no: [138b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Ağa Vakfı’na ait Hobyar mahallesindeki evin kiracısı olan Saya v. Sina’nın kiranın yeni rayic üzere hesaplanmasını istemesi Haremeyn-i Muhteremeyn Evkāfı nâzırı olup atebe-i aliyyede hâlâ Dârüssaâdeti’ş-şerîfe ağası olan iftihârü’-havâss ve’l-mukarrebîn muhtâru ashâbi’l-izzi ve’t-temkîn mu‘temedü’l-mülûk ve’s-selâtîn enîsü’l-hazreti’l-aliyyeti’l-hâkāniye celîsü’s-sa‘âdeti’s-seniyyeti’l-sermediye zü’l-kadri’r-refî‘ ve’l-câhi’l-menî‘ el-mahfûfu bi-sunûfi avâtifi’l-meliki’l-kerîm İdris Ağa b. Abdurrahim hazretleri huzûrunda akd-i meclis olundukdan sonra sâye-i nezâretlerinde olan evkāfdan olup mahrûsa-i İstanbul’da merhûm Abbas Ağa Vakfı’ndan mahmiye-i İstanbul’da Hobyar mahallesinde vâki‘ menzil-i âti’t-tafsîlin hâlâ müste’ciri olan râfi‘ü’l-kitâb Saya v. Sina nâm Yahudi meclis-i şer‘-i hatîr-i lâzımü’t-tevkīrde takrîr-i kelâm edip vakf-ı mezbûrdan mahalle-i mezbûrda vâki‘ lede’l-ahâlî ve’l-cîrân hudûdu ma‘lûm üç tabakada büyût-ı müte‘addideyi müştemil olup altın yüz yetmişe râyic iken iki yüz altmış bin akçeye iştirâ olunmağın yevmî kırk beşer akçe icâre-i müeccele takdîr olunmağla taht-ı icâremde olan menzil-i mezkûrun hâlâ altın yüz yirmiye tenzîl olundukda altın hesâbınca icâresi ecr-i mislinden ziyâde de, kıbel-i şer‘den üzerine varılıp yedimde olan fetvâ-yı şerîfe nazar ve mûcebince icâre takdîr olunması matlûbumdur deyu sultânü’l-ulemâi’l-a‘lâm hâlâ şeyhülislâm müfti’l-enâm hazretlerinden ibrâz olunmuş fetvâ-yı sahîha-i şer‘iyyesine nazar olundukda Zeyd altın yüz yetmişe râyic iken iki yüz altmış bin akçeye iştirâ ettiği menzili vakf edip yine altın yüz yetmiş akçe hesâbınca yevmî kırk beşer akçeye îcâr ettikden sonra cedîd ceyyid akçe zuhûr edip altın yüz yirmiye tenzîl olundukda hâlâ mütevellîsi Amr yüz yirmi akçe bir altın olmak üzere İlya’dan yevmî kırk beşer akçe icâre taleb ve ahzına kādir olur mu?, el-cevâb: olmaz, ecr-i misliyle îcâr olunup altın hesâbınca icâresin alır deyu buyurulmağın ağa-yı müşârun-ileyh ma‘rifetiyle savb-ı şer‘den umdetü İbrahim Çelebi b. Ebîbekir ve hâssa mi‘mârlardan Üstâd Hasan Çelebi b. Hüseyin ve Muslı Çelebi b. Hüsam ve Ali Çelebi b. Halil irsâl olunup anlar dahi vakf-ı mezbûra bi’l-fi‘il mütevellî olan fahrü’l-a‘yân İdris Ağa b. Abdülmennan ve sâir zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile üzerine varıp mu‘âyene ve müşâhede ettiklerinde fi’l-vâki‘ menzil-i mezbûrun üç tabakasında vâki‘ on bâb odanın bir altın yüz yirmi akçe olmak üzere el-ân icâresi ecr-i mislinden zâiddir, hâlâ hesâb-ı mezbûr üzere ecr-i misli ancak otuz akçedir, ândan ziyâdeye tahammülü yokdur deyu bi’l-ittifâk heber verdiklerinde mevlânâ-yı mezbûr mahallinde vukū‘u üzere tahrîr, ba‘de[hû] meclis-i şer‘de [inhâ] etmeğin mâ-vaka‘a bi’t-taleb ketb [olundu]. Şühûdü’l-hâl: es-Sâbıkūn.