Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 100 Hüküm no: 19 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ali’nin ölen kardeşinin, Habib b. Mehmed’deki alacağını sulh yoluyla tahsil ettiği Mahmiye-i İstanbul’da Âşık Paşa mahallesi sükkânından iken bundan akdem fevt olan Abdülkādir Çelebi b. Ali’nin kız karındaşı ve hasren vârisesi olup mahmiye-i mezbûrede Dâye Hâtun mahallesinde sâkine Fâtıma bt. Ali nâm hâtun tarafından husûs-ı âti’l-beyâna vekîl olduğu es-Seyyid Mehmed Çelebi b. es-Seyyid Yakub Çelebi ve Abdi Çelebi b. Ali nâm kimesneler şehâdetleri ile şer‘an sâbit olan Ahmed Çelebi b. Ali nâm kimesne meclis-i şer‘-i şerîf-i lâzımü’t-teşrîfde bâ‘isü’l-kitâb Habib b. Mehmed nâm kimesne mahzarında ikrâr ve takrîr-i kelâm edip müteveffâ-yı mezbûrun deyn-i şer‘îden merkūm Habib zimmetinde hakkı olan kırk riyâlî guruşu müvekkilem mezbûre Fâtıma bundan akdem merkūm Habib’den da‘vâ ve taleb ettikden sonra ol dahi inkâr etmeğin beynlerinde nizâ‘-ı küllî vukū‘undan sonra muslihûn tavassut edip müvekkilem mezbûre ile mezbûr Habib beynlerinde sekiz esedî guruş üzerine inşâ-i akd-i sulh ettiklerinde ol dahi sulh-i mezbûru kabûl ve bedel-i sulh olan meblağ-ı mezbûr sekiz esedî guruşu yedinden tamâmen ahz u kabz edip husûs-ı mezbûra müte‘allika âmme-i de‘âvîden mezbûr Habib’in zimmetini ibrâ eyledi dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-âşir min Rebî‘ilâhir li sene seb‘a ve seb‘în ve elf. Şuhûdü’l-hâl: Ali Çelebi [b.] Ahmed, Mustafa Çelebi b. Murad, Mustafa b. ( ), Ahmed b. Mehmed, Mehmed b. Ahmed, İbrahim Çelebi [b.] Ahmed, Mustafa Çelebi [b.] Ali.