Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 100 Hüküm no: 20 Orijinal metin no: [3a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şamem bt. Budak’ın mülk odasını, Arakil v. Asvador’a sattığı Fi’l-asl vilâyet-i Anadolu’da Eğin kazâsına tâbi‘ Apçağa nâm karye ahâlîsinden olup mahmiye-i İstanbul’da Sultanhamamı kurbunda Ali Paşa-yı Atîk mahallesi sâkinelerinden Şamem bt. Budak nâm Ermeniye mahfil-i kazâda Arakil v. Asvador nâm zimmî muvâcehesinde ikrâr ve takrîr-i kelâm edip akd-i âtînin sudûruna değin taht-ı tasarrufumda olup karye-i mezbûre[de] vâki‘ bir tarafdan Ferhad nâm zimmî mülkü ve bir tarafdan Biçer oğlu Bogos mülkü ve bir tarafdan müşterî-i mezbûr mülkü karye-i mezbûrede vâki‘ olan karındaşları Marayoros ve Margos ve Haradin ve Avanos ve Arakil mülkleri ve bir tarafdan Haçuk oğlu Serkis mülkü ile mahdûd bir bâb tahtânî mülk odamı mezbûr Arakil’e tarafeynden îcâb ve kabûlü hâvî bey‘-i bâtt-ı sahîh-i şer‘î ile on beş esedî guruşa bey‘ edip ol dahi iştirâ ve kabûl eyledikden sonra semeni olan meblağ-ı mezbûr on beş esedî guruşu mezbûr Arakil yedinden tamâmen ahz u kabz edip mebî‘-i mezbûru mahallinde zabta mezbûr Arakil’i taslît eyledim min ba‘d oda-i mezkûre merkūm Arakil’in [mülk-i] müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâmin aşer min Rebî‘ilâhir sene [10]77. Şuhûdü’l-hâl: Ömer Beşe b. Kurd Beşe, Mehmed Beşe b. İbrahim, Bayezid Beşe b. Rüstem, İbrahim Beşe b. Çamkıran, Şükrullah [b.] Mustafa, Talos v. Moğdak, Paroh v. Aslan, Fokis v. Serkis, Sakar v. Palo, Aslan v. Norsiz.