Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 488 Hüküm no: 440 Orijinal metin no: [139a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Ağa Vakfı’na ait Yüzar? Halil Paşa mahallesindeki evin kiracısı olan Yahya Çavuş b. Mehmed’in kiranın yeni rayic üzere hesaplanmasını istemesi Haremeyn-i Muhteremeyn Evkāfı nâzırı olup atebe-i aliyyede hâlâ Dârüssaâdeti’ş-şerîfe ağası olan iftihârü’-havâss ve’l-mukarrebîn muhtâru ashâbi’l-izzi ve’t-temkîn mu‘temedü’l-mülûk ve’s-selâtîn enîsü’l-hazreti’l-aliyyeti’l-hâkāniye celîsü’s-sa‘âdeti’s-seniyyeti’l-sermediye zü’l-kadri’r-refî‘ ve’l-câhi’l-menî‘ el-mahfûfu bi-sunûfi avâtifi’l-meliki’l-kerîm İdris Ağa b. Abdurrahim hazretleri huzûrunda akd-i meclis olundukdan sonra sâye-i nezâretlerinde olan evkāfdan olup mahrûsa-i İstanbul’da merhûm Abbas Ağa Vakfı’ndan Tahtakale kurbünde Yüzar? Halil Paşa mahallesinde vâki‘ menzil-i âti’t-tafsîlin hâlâ müste’ciri olan râfi‘ü’l-kitâb Yahya Çavuş b. Mehmed nâm kimesne meclis-i şer‘-i hatîr-i lâzımü’t-tevkīrde takrîr-i kelâm edip vakf-ı mezbûrdan mahalle-i mezbûrede vâki‘ lede’l-ahâlî ve’l-cîrân hudûdu ma‘lûm üç tabakada büyût-ı müte‘addideyi müştemil olup altın yüz yetmişe râyic iken üç yüz yetmiş bin akçeye iştirâ olunmağın yevmî elli beşer akçe icâre-i müeccele takdîr olunmağla taht-ı icâremde olan menzil-i mezkûrun hâlâ altın yüz yirmiye tenzîl oldukda altın hesâbınca icâresi ecr-i mislinden zâiddir, kıbel-i şer‘den üzerine varılıp yedimde olan fetvâ-yı şerîfe nazar ve mûcebince icâre takdîr olunması matlûbumdur deyu sultânü’l-ulemâi’l-a‘lâm hâlâ şeyhülislâm ve müfti’l-enâm hazretlerinden ibrâz olunmuş fetvâ-yı sahîha-i şer‘iyyesine nazar oldukda Zeyd altın yüz yetmiş râyic iken Bekir’den üç yüz yetmiş bin akçeye iştirâ ettiği menzili vakf edip yine altın yüz yetmiş akçe hesâbınca yevmî elli beşer akçeye Bekir’e îcâr ettikden sonra ced[îd] ve ceyyide akçe zuhûr edip altın yüz yirmi akçeye tenzîl oldukda hâlâ mütevellîsi Amr yüz yirmi akçe bir altın olmak üzere Bekir’den yevmî elli beşer akçe icâre taleb ve ahza kādir olur mu?, el-cevâb: olmaz, ecr-i misliyle îcâr olunur, altın hesâbınca icâresin alır deyu buyurulmağın ağa-yı müşârun-ileyh ma‘rifetiyle savb-ı şer‘den Mevlânâ İbrahim Çelebi b. Ebîbekir ve hâssa mi‘mârlardan Üstâd Muslı Çelebi b. Hüsam ve Hasan Çelebi b. Hüseyin ve Ali Çelebi b. Halil irsâl olunup anlar dahi vakf-ı mezbûra bi’l-fi‘il mütevellî olan umdetü’l-a‘yân İdris Ağa b. Abdülmennan ve sâir zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile üzerine varıp mu‘âyene ve müşâhede ettiklerinde fi’l-vâki‘ menzil-i mezkûrun tabakāt-ı selâsesinde vâki‘ yirmi dört bâb oda ve bi’r-i mâ ve kenîfin yüz yirmi akçe bir altın olmak üzere el-ân icâresi ecr-i mislinden zâiddir, hâlâ hesâb-ı mesfûr üzere ecr-i misli otuz beşer akçedir, ândan ziyâdeye tahammülü yokdur deyu bi’l-ittifâk haber verdiklerin mevlânâ-yı mezbûr mahallinde vukū‘u üzere tahrîr ve ba‘dehû meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu, cerâ zâlike ve, Hurrire fî-evâili şehri Recebi’l-mürecceb sene hamse ve selâsîn ve elf mine’l-hicreti’ş-şerîfe. Şühûdü’l-hâl: es-Sâbıkūn.