Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 490 Hüküm no: 441 Orijinal metin no: [139a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Elvanzâde mahallesindeki evin mutasarrıfları Mehmed Beşe b. Osman, kardeşi Mustafa ve Saliha bt. Mehmed Ağa’nın hisselerinin belirlenmesi Dergâh-ı Âlî -dâme mahfûfen bi’l-me‘âlî- yeniçerilerinden işbu râfi‘ü’l-kitâb Mehmed Beşe b. Osman nâm râcil meclis-i şer‘-i şerîfde takrîr-i kelâm edip Haremeyn-i Şerîfeyn Vakfı’ndan olup mahmiye-i İstanbul’da Elvanzâde mahallesinde vâki‘ iki tarafı emîrü’l-ümerâi’l-kirâm Ahmed Paşa mülkü ve bir tarafı yine vakf-ı mezbûre ve bir tarafı tarîk-i âmma müntehî olup ulven üç bâb beyti ve bir matbah ve tahta-pûşu ve bi’r-i mâ ve kenîfi ve dört bâb dükkân ve cüneyneyi müştemil olup icâre-i mu‘accele ve müeccele ile iki sehmi benim ve bir sehmi li-ebin karındaşım Mustafa nâm kimesnenin ve bir sehmi Saliha bt. Mehmed Ağa’nın tasarrufunda olan vakıf menzilin kıbel-i şer‘den üzerine varılıp herbirimizin hissesi ta‘yîn olunması matlûbumdur dedikde savb-ı şer‘-i mutahhardan Mevlânâ İbrahim Çelebi b. Ebîbekir ve hâssa mi‘mârlardan Üstâd Hasan Çelebi b. Hüseyin irsâl olunup anlar dahi zeyl-i kitâbda mastûrü’l-esâmî olup ebniye ve sukūfa vukūfu olan bî-garaz Müslimîn ile menzil-i mezkûrun üzerine varıp mezbûrân Saliha ve Mustafa muvâcehesinde nazar ve mesâha ettiklerinde iki sehmine tûlen ve arzen bi-hesâb-ı şatrancî yüz seksen beş zirâ‘ arsa üzerinde vâki‘ şehnişînli ve ocaklı bir büyük oda ve ona muttasıl bir ocaksız küçük oda ve sofa ve kenîf ve bi’r-i mâ ve tahta-pûş ve zikr olunan küçük odanın dolma duvarı berâber tahtında ahırı ve iki dükkânı ve iki sehmine vech-i sâbık üzere iki yüz beş zirâ‘ arsa üzerinde bir fevkānî oda ve altında ahır ve matbah ve iki dükkân ve cüneyne isâbet edip lâkin hisse-i sâniyede kenîf ve bi’r-i mâ olma[ma]ğla bâlâda zikr olunduğu üzere hisse-i ûlâ sâhibi hisse-i sâniye sâhibine on zirâ‘ arsa ve iki bin akçe vermek lâzımdır deyu ittifâk ettiklerinden sonra mezbûrân Saliha ve Mustafa merkūm Mehmed’e iki bin akçe verip ol dahi hisse-i sâniyeyi kabûl edip beynlerinde terâzî olduğunu mevlânâ-yı mezbûr mahallinde tahrîr ve ba‘dehû mahfil-i kazâda alâ-vukū‘ihî ihbâr etmeğin mâ-vaka‘a bi’t-taleb ketb olundu. Hurrire fî-evâhiri Ramazâni’l-mübârek li-sene hamse ve selâsîn ve elf. Şühûdü’l-hâl: Mehmed Efendi b. Hüseyin el-müderris, Fahrü’l-a‘yân Hasan Çavuş b. Mustafa, Mustafa Efendi b. Hüseyin, Abdülkerim Bey b. Evhad el-cündî ve gayruhüm. (Mühür)