Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 490 Hüküm no: 442 Orijinal metin no: [139b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üç evin Abbas Halîfe b. Abdullah’ın vakfı olduğu Elhamdülillâhi’l-alîm ellezî erşede ibâdehu’l-mü’minîne ve’l-mü’minâti ile’l-a‘mâli’s-sâlihât ve esâra ile’l-müslimîne ve’l-müslimât bâliğan el-hayrât haysü kāle inne’l-hasenât yüzhibne’s-seyyiât ve’s-salâtü ve’s-selâmü alâ-resûlihî Muhammedin eşrefü’l-mahlûkāt ve alâ-âlihî ve ashâbihi’llezîne hedâhu’l-halka ilâ sebîli’l-hasenât ammâ ba‘d. İşbu mazmûnunda vakıf ikrârından bahseden sahîh ve şer‘î bir hüccettir. Kıdvetü’l-havâs ve’l-mukarrebîn zübdetü’l-izzi ve’t-temkîn Elmas Ağa b. Abdülmu‘în ve umdetü’l-e‘âlî ve’l-e‘âzim müstecmi‘u’l-mehâmid ve’l-mekârim Abdullah Ağa b. Abdüddâim nâm kimseler, bundan akdem vefât eden merhûm Abbas Halîfe b. Abdullah’ın vasiyetlerinin tenfîzine vasiyy-i muhtâr olan ve vesâyeti şer‘an sâbit olup emr-i sultânî ile müteveffâ-yı mezkûrun terekesine vâzı‘-yed ve mutasarrıf olan ve âti’z-zikr husûsu münkir bulunan iftihârü’l-havâs ve’l-mukarrebîn muhtârü ashâbi’l-izzi ve’t-temkîn mu‘temedü’l-mülûk ve’s-selâtîn enîsü’l-hazreti’l-aliyyeti’l-hakaniyye celîsü’s-sa‘âdeti’s-seniyyeti’s-sermediyye zü’l-kadri’r-refî‘ ve’l-câhi’l-menî‘ el-mahfûf bi-sunûfi avâtıfi’l-meliki’l-ehad İdris Ağa b. Abdüssamed el-müşerref bi-hizmeti dâri’s-sa‘âde mahzarında, âti’-beyân vakfa kıbel-i şer‘-i mergûbdan mütevellî nasbedilen bâ‘isü hâze’r-rakīm fahrü’l-emâcid İdris Ağa b. Mehmed el-müteferrika nâm kimseden sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, mahmiye-i Kostantıniyye mahallâtından Çelebioğlu mahallesinde vâki‘, on beş bâb fevkānî ve tahtânî hâneyi hâvî, hudûdu iki tarafından merhûm Kasım Paşa vakfı, bir tarafından tarîk-ı âm ile mahdûd menzil ve yine mahalle-i mezbûrede vâki‘, fevkānî ve tahtâni on iki bâb hâneyi hâvî, hudûdu bir tarafından merhûme Kethüdâ Hatun mülkü, bir tarafından kenîsetü’l-Yahûd, bir tarafından hısn-ı mahmiye-i mezbûre surları, bir tarafından tarîk-ı âm ile mahdûd bulunan menzil ve yine mahalle-i mezbûrede vâki‘, fevkānî ve tahtânî on hâneyi hâvî, hudûdu bir tarafından Münevver Hatun mülkü, bir tarafından merhûm Ömer Ağa vakfı, bir tarafından kenîsetü’l-Yahûd, bir tarafından tarîk-ı âm ile mahdûd menzil ve Ali Paşa mahallesinde Tahte’l-kal‘a nâm mevzi‘de vâki‘, yirmi dört bâb fevkānî ve tahtânî bâb hâneyi hâvî, hudûdu merhûm Mehmed Ağa vakfı, iki tarafından tarîk-ı âm, bir tarafından kenîsetü’l-Yahûd ile mahdûd bulunan menzil vakf-ı sahîh-i şer‘î ve habs-i sarîh-i mer‘îdir. O günün vakf-ı mezbûr mütevellîsi merhûm Ahmed Efendi bunların her birini vakf-ı mezbûrun nâzırı sâhibü’l-izzi ve’l-iclâl Dârüssa‘ade ağası İsmail Ağa b. Abdülmüte‘âlîn re’yi ile ve vâkıf-ı mezbûr Abbas Halîfe’nin mâlı ile ve onun menzil alınıp istiğlâl edilmesi şartı üzere bin otuz bir senesinde iştirâ etmiştir. Vâkıf-ı mezbûr menzil-i mezbûrun icâre-i mu‘tâde ile icâreye verilip hâsıl olan ücret-i kirâdan on akçenin mütevelliye verilmesini şart etti… Hâkim-i muvakkı a‘lâ hâze’l-kitâb bi-tevkī‘ihi’ş-şerîfi’l-müstetâb, ba‘de ri‘âyeti şerâiti’l-kabûl vakfın sıhhatine ve lüzûmuna hükmetti. Vakf-ı mezbûr bu sûretle tebdîl ve tağyîri asla câiz olmayacak şekilde müseccel, müebbed sahîh ve lâzım bir vakıf oldu. Fe-men beddlehû ba‘de mâ semi‘ahû fe-innemâ ismuhû ale’llezîne yübeddilûnehû inne’llâhe semî‘un alîm ve ecrü’l-vakıf ale’l-hayyi’l-cevâdi’l-kerîm. Cerâ zâlike ve hurrire fi’l-yevmi’l-hâmis mine’l-Muharrem li-sene sitte ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Fahrü’l-e‘âlî ve’l-efâhim Süleyman Ağa b. Abdüddâim, umdetü erbâbi’t-tahrîr Mukata‘acı Mehmed Efendi, fahrü’l-a‘yân Kethüdâ Ahmed Ağa b. Rüstem el-müteferrika, fahrü’l-emâcid ve’l-ekârim Müteferrika başı Sefer Ağa b. Abdüddâim, Mevlânâ Osman Efendi b. Mehmed, Mevlânâ İbrahim Çelebi b. Ebîbekir, Mevlânâ Halil Efendi b. Mahmud, Ali Bey b. Abdullah ve gayrühüm mine’l-hâzırîn