Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 492 Hüküm no: 443 Orijinal metin no: [140a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. II. Osman’ın Halîfesi Abbas Ağa’nın es-Seyyid Ömer mahallesinde hayrına yaptırdığı çeşmeye su getirmesi El-emru kemâ cerâ ve eş-şe’nu alâ-mâ-yürâ harrerehû efkarü’l-verâ İbrahim b. Süleyman el-müevellâ-hilâfeten bi-medîneti Ebî Eyyüb Ensârî -afâ anhüme’r-rabbü’l-bârî- Merhûm Sultân Osman Hân hazretlerinin sâbıkā halîfesi olan sâhibü’l-izzi ve’t-temkîn mukarrebü’l-mülûk ve’s-selâtîn Abbas Ağa tarafından husûs-ı âti’l-beyâna vekîl olup nehc-i ta‘bîr-i mer‘î üzere vekâleti sâbite olan fahrü’l-emâcid ve’l-ekârim Mustafa Ağa b. Abdüddâim meclis-i şer‘-i şerîf-i şâmihü’l-erkân ve mahfil-i dîn-i münîf-i râsihü’l-bünyânda sevk-i kelâm edip müvekkil-i müşârun-ileyh Abbas Ağa’nın mahmiye-i İstanbul’da es-Seyyid Ömer mahallesinde Küçük Hamâm kurbünde tarîk-i Müslimîne hasbeten lillâh inşâ buyurdukları çeşme-i latîfelerine icrâ için Havâss-ı Aliyye kazâsına tâbi‘ Davud Paşa bahçesi kurbünde Kavaklardibi demekle ma‘rûf mevzi‘de âharın mülküne ittisâlden ârî mevzi‘-i hâlîyi hafr ettirip cem‘ ettikleri mâ’î menba‘ından kendi hâlis mâllarıyla binâ buyurdukları mecrâ-yı mâdan ol mahalle karîb yerden Çepedilsiz? demekle ma‘rûf bî-zebân Ali Ağa’nın suyoluna ilhâk ve âdet-i me’lûfe üzere hakk-ı mecrâ alıkonuladan mâ‘adâ kendi mülk-i hâlisi olan icrâ-yı mânın mikdârı ma‘lûmları olmak murâdıdır, hâlen şer‘-i hatîrden husûs-ı mezbûru tahkīk için âdem irsâl olunmak taleb ederim dedikde savb-ı şer‘-i şerîfden fahrü’l-müderrisîn Mevlânâ Hidayetullah Efendi irsâl olunup bi’l-fi‘il suyolu nâzırı olan zahrü’l-a‘yân Hasan Ağa b. Abdülmennan ve hâssa suyolculardan İbrahim Beşe b. Ömer ve zeyl-i kitâbda mastûrü’l-esâmî Müslimîn ile mahall-i mezbûra vardıklarında zikr olunan mevzi‘de mevcûd olan mâ takdîr olundukda müvekkil-i müşârun-ileyh Abbas Ağa’nın bulup cem‘ ettiği sunun cümlesi kâmil iki masura su olduğunu bi’l-ittifâk tahkīk ettiklerinde mevlânâ-yı mezbûr vâki‘ hâli mahallinde tahrîr ettikden sonra gelip meclis-i şer‘-i şerîfde alâ-mâ-vukū‘ihî haber vermeğin mâ-vaka‘a gıbbe’l-ibtiğā sebt ve imlâ olundu. Hurrire fî-evâsıtı Zilka‘deti’ş-şerîfe li-sene isneteyn ve selâsîn ba‘de’l-elf. Şühûdü’l-hâl: Mustafa Ağa b. İskender el-müteferrika, Ali Bey b. Abdullah el-cündî, Maksud Efendi el-kādî, Mazaffer Ağa el-müteferrika, Ahmed Ağa b. Mustafa, Mehmed Bey eş-Şehîr bi-Karahoca, Mehmed Efendi, Hüseyin Çavuş b. Abdullah, Hasan Beşe b. Abdullah et-tabbâhü’l-hâssa, Ahmed Beşe b. İlyas, İdris Ağa b. Mehmed.