Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 493 Hüküm no: 444 Orijinal metin no: [140a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Bolu sancağı Eflani kazasındaki Celali istilasında yanan dükkan ve odalar enkazının Abdüllatif Efendi b. Fazlullah’a satılması ve arsasının kiraya verilmesi Atebe-i aliyye ve südde-i seniyyede bi’l-fi‘il Dârüssaâde ağası olup Haremeyn-i Şerîfeyn Evkāfı’na nâzır olan kıdvetü’l-havâss ve’l-mukarrebîn zübdetü ashâbi’l-izzi ve’t-temkîn mu‘temedü’l-mülûk ve’s-selâtîn enîsü’l-hazreti’l-aliyyeti’s-sultâniyye celîsü’d-devleti’s-seniyyeti’l-hâkāniyye zü’l-kadri’r-refî‘ ve’l-câhi’l-menî‘ el-mahfûfu bi-sunûfi avâtıfi’l-melik ve’l-hakîm Hazret-i İdris Ağa b. Abdülhalim meclis-i şer‘-i şerîf-i şâmihü’l-imâd ve mahfil-i dîn-i münîfi râsihü’l-evtâdda işbu râfi‘ü’l-kitâb Abdüllatif Efendi b. Fazlullah eş-şehîr bi-Hocazâde tarafından ikrâr-ı câi’z-zikri tasdîka vekîl olup vekâleti hasm-ı câhid mahzarında nehc-i şer‘î-i mu‘teber üzere sâbite olan fahrü’l-kuzât Sofuzâde demekle şehîr Nurullah Efendi b. Hüseyin muvâcehesinde ikrâr u i‘tirâf edip evkāf-ı mezbûreden olup vilâyet-i Anadolu’da Bolu sancağında Eflani kazâsına tâbi‘ Büyükpazar demekle ma‘rûf ahâlîsine intimâ ile ta‘rîf ve tavsîfden müstağnî olan sûkda vâki‘ vakıf dekâkîn ve hucurât Celâlî istîlâsında ihrâk olup müddet-i medîde hâli ve mu‘attal olmağla vakf-ı mezbûra icâresi hâsıl olmayıp küllî gadr olmuşdu, hâlâ zikr olunan dekâkîn ve hucurâtın nıkzı bey‘ olunup arsası îcâr olunmak vakf-ı mezbûra her vechile enfa‘ olduğunu sikāt ihbâr etmeğin vech-i muharrer üzere nıkz-ı mezkûr ve arsa-i merkūme Sûk-ı Sultânî’de tâlibine arz olunup ragabât-ı nâs münkatı‘a oldukda müvekkil-i mûmâ-ileyh Abdüllatif Efendi üzerinde meblağ-ı âti’l-beyânda karâr edip ziyâde ile tâlib-i âhar olmamağla mârru’z-zikr dekâkîn ve hucurâtın nıkzını müvekkil-i mûmâ-ileyhe otuz bin nakd-i râyic fi’l-vakt [140b] akçeye bey‘-i bâtt-ı sahîh-i şer‘î ve izn-i mütevellî ile bey‘ edip ol dahi iştirâ ettikde semen-i mezbûr otuz bin akçeyi nezâretim hasebiyle vekîl-i mersûm Nurullah Efendi yedinden vakf-ı mezbûr için tamâmen ahz u kabz edip ve müvekkil-i mûmâ-ileyhi nıkz-ı mezkûru mahallinde kabza taslît eylediğimden sonra arsa-i mezkûreyi târîh-i kitâbdan her akd-i evvelin âhiri âhirin evveli olmak üzere otuz üç aded ukud-ı (?) müterâdife ile akd olunup doksan dokuz senesine varınca vakt-i merkūm arsa-i mezbûrenin ecr-i misli olup ehl-i hibre ta‘yîn eyledikleri üçer bin akçe icâre-i müeccelesini edâ etmek üzere müvekkil-i mûmâ-ileyh Abdüllatif Efendi’ye beher sene üç bin akçe icâre-i tavîle ile îcâr edip ol dahi vech-i meşrûh üzere istîcâr ve kabûl eyledi dedikde gıbbe’t-tasdîk bi’t-taleb ketb olundu. Hurrire fî-evâili Saferi’l-hayr li-sene sitte ve selâsîn ve elf. Şühûdü’l-hâl: Mefharü’l-emâcid ve’l-ekârim Sefer Ağa b. Abdüddâim el-müteferrika, fahrü’l-kuzât Ca‘fer Efendi el-kādî, Mustafa Efendi eş-Şehîr Semercizâde, Mehmed Çelebi b. Salih el-müsta‘id, Mustafa Efendi el-müderris, Hüseyin b. Abdullah, Ali Bey b. Abdullah el-bevvâb ve gayruhüm.