Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 101 Hüküm no: 21 Orijinal metin no: [3a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Yani v. Kostantin’in ölen amcasının Mihal v. Varadin’deki alacağının tahsil edilip tek vâris olan kendisine verilmesi Fi’l-asl vilâyet-i Rumeli’nde Kalavrita kazâsına tâbi‘ Şelyane nâm karye ahâlîsinden olup Mahmiye-i İstanbul’da Davud Paşa kurbunda Yenimahalle sükkânından bâ‘isü’l-kitâb Papa Yani v. Kostantin nâm zimmî meclis-i şer‘de Mihal v. Varadin [3b] nâm zimmî muvâcehesinde üzerine da‘vâ ve takrîr-i kelâm edip fi’l-asl karye-i mezbûre ahâlîsinden olup mahrûse-i Galata müzâfâtından Marmara nâhiyesine tâbi‘ Tavşan Adası demekle ma‘rûf adada sâkine iken bundan akdem hâlik olan Nikola v. İstati zimmînin cihet-i deyn-i şer‘îden mezbûr Mihal zimmetinde on iki tamâm ve bir sümün esedî guruş hakkı olup benim babam mezbûr Kostantin ile hâlik-i merkūm Nikola’nın babası merkūm İstati li ebeveyn karındaşlar olup babaları ismi Yorgi v. Tanaş ve anaları ismi Marine ve maskat-ı re’sleri karye-i mezbûre olup hâlik-i mezbûrun ben li ebeveyn karındaşı oğlu olup ve hasren vârisi olmağla suâl olunup meblağ-ı mezbûrun merkūm Mihal’den alıverilmesi matlûbumdur dedikde gıbbe’s-suâl mezbûr Mihal hâlik-i mezbûra cihet-i mezbûreden zimmetine vâcibü’l-edâ on iki tamâm ve bir sümün esedî guruş deyni olduğunu ikrâr lâkin mezbûrun vech-i muharrer üzre verâsetini inkâr edicek müdde‘î-i mezbûrdan müdde‘âsını mütebeyyine beyyine taleb olundukda fi’l-asl karye-i mezbûre ahâlîsinden olup hâlâ mahalle-i mezkûrede sâkin Papa Dimo v. Petrovelti Marmara kurbunda sâkin Panayot v. Dimitri nâm zimmî li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûrun babası Kostantin ile hâlik-i merkūmun babası mezkûr İstati li ebeveyn karındaşlar olup babaları ismi Yorgi v. Tanaş ve anaları ismi Marine ve maskat-ı re’sleri karye-i mezbûre olup müdde‘î-i mezbûrun li ebeveyn karındaşı oğlu olmağla verâseti müdde‘î-i mezkûra münhasıradır ve gayrı vârisi olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûrun vech-i muharrer üzre verâsetine hükm olundukdan sonra meblağ-ı mezbûru müdde‘î-i merkūma edâ ve teslîme merkūm Mihal’e tenbîh birle mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilâhir sene [10]77. Şuhûdü’l-hâl: Mehmed Çelebi b. Abdullah Kethüdâ-yı muhzırân, Şükrullah Bey b. Mustafa, Abdi Çelebi b. Hüseyin, İbrahim Çelebi b. Ahmed, Mehmed Çelebi [b.] Ramazan, Mustafa [b.] el-Hâc Ahmed.