Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 512 Hüküm no: 451 Orijinal metin no: [148b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üveys Bey b. Abdullah’ın vakfetmiş olduğu evin kiracısı olan Teberdar İsmail Ağa’nın evi tamir talebinin uygun olduğu Dârü’s-saltanati’s-seniyye Kostantıniyyeti’l-mahmiye’de vâki‘ Sarây-ı Atîk’de Serbölük-i Teberdârân-ı Hâssa olan kıdvetü’l-emâcid ve’l-ekârim umdetü’l-efâhim ve’l-e‘âzim İsmail Ağa b. Abdüddâim meclis-i şer‘-i şerîf-i envere gelip takrîr-i kelâm edip mahrûsa-i Galata hâricinde Yazıcı mahallesinde sâkin iken vefât eden Üveys Bey b. Abdullah nâm korucubaşı silk-i mülkünde münselik olup mahalle-i mezbûrede vâki‘ bir tarafı Nasuh b. Abdullah mülkü ve bir tarafı Ahmed Bey b. Abdullah mülkü ve bir tarafı Hasan Bey b. Abdullah et-Tabbâh-ı Hâssa mülkü ile ve bir tarafı tarîk-i âm ile mahdûd olup muhavvata-i dâhiliyyesi iki bâb fevkānî ve iki bâb tahtânî evleri ve fırını ve üç göz anbârı ve kenîfi ve bi’r-i mâ’î ve cüneyneyi eşcâr-ı müsmireyi ve muhavvata-i hâriciyyesi iki bâb fevkānî ve bir bâb tahtânî evleri ve ahırı ve bi’r-i mâ’î ve kenîfi müştemil olan mülk menzilini cümle tevâbi‘ ve levâhıkıyla vakf ve habs edip menzil-i mezbûrun süknâsını vakfiye-i ma‘mûlün-bihâsında evvelâ nefs-i nefîsesine ve sâniyen zevcesi Asiye bt. Geyvan’a ve sâlisen Afitab’dan gayrı utekāsına ba‘de’l-inkırâz Medîne-i Münevvere -sallallâhü te‘âlâ alâ-münevvirihâ- fukarâsına vakf ve şart eylediği musarrah olmağla vâkıf-ı merhûm-ı mezbûrun utekāsı münkarız olmağla menzil-i mezkûrun tasarrufu fukarâ-i merkūmeye âid olmağın hâlâ Medîne-i Münevvere Evkāfı’na mütevellî olan fahrü’l-emâsil ve’l-akrân İsmail Çelebi b. ( ) menzil-i mezkûru tâlibîne arz edip sekiz bin akçe icâre-i mu‘accele ve beher şehr altmış akçe icâre-i müecceleden ziyâde ile tâlib-i âhar olmamağla mütevellî-i mezbûr menzil-i mezkûru sekiz bin akçe icâre-i mu‘accele ve beher şehr altmış akçe icâre-i müeccele ile bana îcâr edip ben dahi istîcâr ve kabûl eylediğimde menzil-i mezkûrda mâlım ile müceddeden binâ ihdâsına mütevellî-i mezbûr izin ve târîh-i kitâb şehri gurresiyle müverrah hatem ve imzâsını müştemil yedime tezkire vermişdi. El-hâletü hâzihî tezkire-i mezbûreye nazar olunup mûcebince savb-ı şer‘den dahi hüccet-i şer‘iyye verilmek matlûbumdur dedikde müşârun-ileyh İsmail Ağa yedinde olan mütevellî tezkiresine nazar olunup mazmûnu takrîrine muvâfık bulunmağın bu hurûf ketb ü imlâ olunup yedine def‘ olundu. Hurrire fî-evâsıtı Cemâziyelevvel li-sene sitte ve selâsîn ve elf. Şühûdü’l-hâl: Ali Bey b. Abdullah el-bevvâbü’s-sultânî, Hüseyin Bey b. Abdullah el-bevvâbü’s-sultânî, Mehmed Efendi b. Muharrem el-imâm ve gayruhüm.