Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 513 Hüküm no: 452 Orijinal metin no: [148b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Midilli’deki Küçük Sinan’ın vakfettiği bahçenin mutasarrıfı olan Bayram Çelebi b. Yusuf’un bahçeyi imar etmek istemesi Sâhibü hâze’l-kitâb Tophane sâkinlerinden kıdvetü’l-emâsil ve’l-eşbâh Bayram Çelebi b. Yusuf meclis-i şer‘-i şerîf-i envere gelip takrîr-i kelâm ve ta‘bîr ani’l-merâm edip cezîre-i Midilli’de Ayamarine nâm mevzi‘de vâki‘ merhûm Küçük Sinan Medîne-i Münevvere -sallallâhü te‘âlâ alâ-münevirrihâ- fukarâsına vakf eylediği inde’l-ahâlî ma‘lûmetü’l-hudûd olan bahçenin mahsûlünden senede yüz altın hâsıl olup lâkin bahçe-i mezbûre harâba müşrif olmağın icâre-i mu‘accele ile îcâr olunmak vakfa evlâ ve enfa‘ olduğu ecilden yirmi bin akçe icâre-i mu‘accele ve geri her sene-i sâbık üzere yüz altın icâre-i müeccele ve vâkıf-ı merhûmun dahi utekāsına ta‘yîn olunan vazîfe-i mu‘ayyenelerin edâ edip ve lâzım gelen meremmâtını dahi kendi mâlım ile meremmet edip ve vâki‘ olan binâ-i cedîdi icâre-i mu‘acceleme mahsûb olmak üzere bana deruhde ve iltizâm ve kabûl ettiğimde zabt-ı tasarruf için hâlâ Dârüssaâde ağası olan ve evkāf-ı mezbûre nâzırı olan iftihârü’l-havâs ve’l-mukarrebîn muhtâru ashâbi’l-izzi ve’t-temkîn mu‘temedü’l-mülûk ve’s-selâtîn enîsü’l-hazreti’l-aliyyeti’s-sultâniyye celîlü’d-devleti’l-hakaniyye el-muhtassu bi-mezîdi inâyeti’l-meliki’l-mu‘în İdris Ağa b. Abdülkerim hazretleri bin otuz altı senesi mâh-ı Cemâziyelevvel gurresiyle müverrah hatem ve imzâsını müştemil yedime tezkire vermişdi. El-hâletü hâzihî tezkire-i mezbûreye nazar olunup mûcebince savb-ı şer‘-i mutahhardan dahi hüccet-i şer‘iyye verilmek matlûbumdur dedikde mezbûr Bayram Çelebi’nin yedinde olan tezkireye nazar olunup takrîrine mutâbık bulunmağın mâ-hüve’l-vâkı‘ bi’t-taleb ketb olundu, cerâ zâlik ve, Hurrire fi’l-yevmi’l-ışrîn min-şehri Cemâziyelevvel li-sine sitte ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Mehmed Bey b. Abdullah el-cündî, Hüseyin Bey b. Abdullah el-cündî, Ömer b. Abdullah el-müezzin, el-Hâc Fazlullah b. ( ) Kethüdâ-yı Bezzâzistân, Mustafa Efendi b. Veli el-Kādî be-kazâ-i İznikmid, Hüseyin Çelebi b. Behram, Yusuf Çavuş b. Abdullah, İbrahim Çelebi b. ( ) sâkin-i Tophane, Ali Çelebi b. Rüstem, el-Hâc Yusuf b. Abdullah, Mustafa Bey b. ( ) Mütevellî-i Ayasofya, Yusuf Bey b. Abdullah el-cündî Kâtib-i Kılıç Ali Paşa, el-Hâc Mahmud b. Mehmed el-bevvâbü’s-sultânî.