Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 514 Hüküm no: 453 Orijinal metin no: [149a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun b. Ahmed’in Abbas Ağa Vakfı’na olan borcunu kabul etmesi Mahmiye-i Kostantıniyye’de ( ) mahallesinde sâkine Âişe Hatun bt. Ahmed meclis-i şer‘-i şerîf-i enverde merhûm Abbas Ağa Vakfı’na bi’l-fi‘il [mütevellî] olan fahrü’l-akrân Osman Bey b. Mahmud nâm bevvâbü’s-sultânî muvâcehesinde ikrâr u i‘tirâf edip kâsid akçe zamânında guruş yüz beş akçeye râyic iken vakf-ı mezbûr mâlından yetmiş iki bin akçe istikrâz edip meblağ-ı mezbûrun mukābelesinde hîn-i istikrâzda Müteferrika Yusuf Ağa yediyle silk-i mülkünde münselik olan bir cevherî kuşağı mütevellî-i merkūma rehn vaz‘ edip ol dahi irtihân ve kabz ettikden sonra tashîh-i sikke olunup ba‘de’l-hesâb zimmetime cedîd ve ceyyid elli altı bin dört yüz akçe lâzım gelip ba‘dehû rehn-i mezkûru müşârun-ileyh Müteferrika Yusuf Ağa ile mütevellî-i merkūmdan alıp bey‘ edip meblağ-ı mezbûrun kırk sekiz bin beş yüz akçesini mütevellî-i merkūma îfâ ve teslîm edip meblağ-ı mezbûrdan bâkī ve murâbaha-i şer‘iyyesinden zimmetimde yedi bin dokuz yüz akçe el-ân vâcibü’l-edâ ve lâzımü’l-kazâ deynimdir dedikde mukırre-i merkūme Âişe Hatun ikrâr-ı meşrûhunda mütevellî-i merkūm bi’l-müvâcehe tasdîk etmeğin mâ-hüve’l-vâkı‘ gıbbe’t-taleb ketb olundu. Hurrire fî-evâhiri Cemâziyelâhire li-sene sitte ve selâsîn ve elf. Şühûdü’l-hâl: Kıdvetü’l-emâsil ve’l-akrân Mustafa Ağa Kethüdâ-yı Bevvâbân-ı Sarây, Mustafa Efendi b. ( ) Hoca-i Teberdârân, Çoban? b. Ahmed, Berber Mustafa Bey b. ( ) el-bevvâb, İsmail Çelebi b. ( ) el-müezzin, Mustafa Bey b. ( ) el-Eyyûbî el-bevvâbü’s-sultânî, Mehmed Beşe b. Halil el-bevvâbü’s-sultânî, Yusuf Bey b. ( ) Kîlârî, İbrahim Bey b. ( ) Ser-oda-i Teberdârân, Körük Mehmed Bey b. ( ) el-bevvâb, fahrü’l-emâcid ve’l-ekârim Abbas Ağa-yı Sarây-ı Atîk, Tophaneli Hüseyin Bey b. ( ), Ali Bey b. Abdullah el-bevvâb ve gayruhüm mine’l-hâzırîn.