Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 515 Hüküm no: 454 Orijinal metin no: [149a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Ağa Vakfı mütevellisi Osman Bey’in Saray-ı atik Ağası Ahmed Ağa’dan aldığı eski rayiçten akçenin kesrini tespit ettirmesi Atebe-i aliyye südde-i seniyyede vâki‘ evkāfdan merhûm Abbas Ağa Vakfı’na mütevellî olan fahrü’l-akrân Osman Bey b. Mahmud nâm bevvâbü’s-sultânî meclis-i şer‘-i şerîf-i şâmihü’l-imâda gelip takrîr-i kelâm ve ta‘bîr ani’l-merâm edip sâbıkā Sarây-ı atîk ağası olan kıdvetü’l-emâcid ve’l-ekârim Ahmed Ağa b. Abdüddâim mukaddemâ vakf-ı mezbûrun yüz beş bin akçesine vaz‘ ettiği kâsid akçe zamânında guruş yüz beş akçeye râyic iken müşârun-ileyh Ahmed Ağa meblağ-ı mezbûru bana teslîm etmekle ben dahi tevliyetim hasebiyle zimem ettiğimden sonra tashîh-i sikke olunmağın meblağ-ı mezbûr seksen üç bin dört yüz akçeye tenzîl olunup yirmi bir bin altı yüz akçe kesri olmuşdur, yedimde olan zimem defteri ve istiğlâl hüccetlerine nazar olunup vech-i muharrer üzere meblağ-ı mezbûrun yirmi bir bin altı yüz akçe kesri olduğuna savb-ı şer‘den dahi [hüccet-i] şer‘iyye verilmek matlûbumdur dedikde fi’l-hakīka mütevellî-i mesfûr Osman Bey’in yedinde olan zimem defterine ve istiğlâl hüccetine nazar olundukda meblağ-ı mezbûrun hesâb-ı mezkûruyla yirmi bir bin altı yüz akçe kesri olduğu mütehakkık olmağın mâ-hüve’l-vâkı‘ gıbbe’t-taleb ketb olundu. Hurrire fi’l-yevmi’s-sânî ve’l-ışrîn min-Cemâziyelâhire li-sene sitte ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: es-Sâbıkūn.