Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 515 Hüküm no: 455 Orijinal metin no: [149a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayasofya-i Kebir mahallesinden Çeşmisiyah Hatun bt. Abdullah’ın oturmuş olduğu Haremeyn Vakfı’na ait evi tamir ettirmesi Dârü’s-saltanati’s-seniyye Kostantıniyyeti’l-mahmiye’de Ayasofya-i Kebîr mahallesinde sâkine Çeşmisiyah Hatun bt. Abdullah meclis-i şer‘-i şerîf-i enverde bi’l-fi‘il Haremeyn-i Şerîfeyn Evkāfı’na mütevellî olan fahrü’l-akrân İsmail Çelebi b. ( ) nâm bevvâb-ı sultânî mahzarında takrîr-i kelâm edip mahalle-i mezbûrda Sarây-ı Cedîd mukābelesinde vâki‘ evkāf-ı mezbûreden olup bir tarafı Ayasofya-i Kebîr Vakfı ve bir cânibi merhûm Sinan paşa mülkü ve bir cânibi sâbıkā çavuşbaşı olan Mehmed Ağa mülkü ile Kapıcı Mehmed Bey b. ( ) mülkü ve bir cânibi Bâb-ı Hümâyûn Meydanı ile mahdûd icâre-i mu‘accele ve beher yevm dört akçe icâre-i müeccele ile mutasarrıf olduğum menzil mürûr-ı eyyâm ve kürûr-ı a‘vâm ile harâb olup kābil-i süknâ olmamağla mukaddemâ izn-i şer‘-i şerîf ve ma‘rifet-i mütevellî ile menzil-i mezkûru icâre-i mu‘acceleye mahsûb olmak üzere zevcim fahrü’l-akrân Kenan Bey b. Abdülmennan mâlı ile ta‘mîr ve termîm etmiş idim. El-hâletü hâzihî savb-ı şer‘den üzerine varılıp ihdâs ettiğim ebniyenin ne mikdâr akçeye tahammülü vardır takvîm-i sahîh ile takvîm ve tahmîn olunması matlûbumdur dedikde kıbel-i şer‘den Mevlânâ Mehmed Efendi b. Ömer ve hâssa mi‘mârlardan Üstâd Hasan Çelebi b. Hüseyin ve Ali Çelebi b. Halil irsâl olunup zeyl-i sütûrda isimleri mastûr olan Müslimîn ile üzerine varılıp mütevellî-i müşârun-ileyh İsmail Çelebi huzûrunda mu‘âyene ettiklerinde fi’l-hakīka bennâ zirâ‘ıyla bi-hesâb-ı şatrancî kırk zirâ‘ mahlût taş duvarın hâtılı ve neccâriye ve hammâliyesi beher zirâ‘ yirmişer akçeden sekiz yüz akçe, fevkānî ve tahtânî odaların yirmi altı direk ve başlıklarıyla ve neccâriyesi beher direk yüzer akçeden iki bin altı yüz akçe, bi-hesâb-ı şatrancî iki tabakada yüz seksen zirâ‘ müceddeden tahta döşeme kirişleriyle neccâriyesi beher zirâ‘ ellişer akçeden sekiz bin beş yüz akçe, bir masandra kilidli dolabıyla kemer kapısı nakkāşiyesi [149b] ile bin beş yüz akçe, iki duvar dolabı rahtıyla ve boya ve neccâriyesi ile altı yüz akçe ve müceddeden kemer kapı kanâdlarıyla neccâriyesi altı yüz akçe, tuğla davlunbazlı bir ocak altı yüz akçe, bi-hesâb-ı şatrancî müceddeden dolma tuğla duvarın kireç sıva ve kara sıva ve neccâriyesi beher zirâ‘ yirmi beşer akçeden bin üç yüz yetmiş beş akçe, iki pencere kanâdlarıyla neccâriyesi beher pencere yüz altmışar akçeden üç yüz yirmi akçe, müdevver iki pencere camları yüz seksen akçe, bi-hesâb-ı şatrancî seksen dört zirâ‘ müceddeden tavan beher zirâ‘ kırk beşer akçeden üç bin yedi yüz seksen akçe, bi-hesâb-ı şatrancî yüz elli zirâ‘ müceddeden sakfın mahlût kiremid ve padavra ve üstâdiyye ve hammâliyesi beher zirâ‘ kırk beşer akçeden dört bin yedi yüz yirmi beş akçe, iki tabakada trabzan beher trabzan ikişer yüz akçe, bi-hesâb-ı şatrancî yirmi sekiz zirâ‘ müceddeden tahta-pûş ve tahta perde mertekleriyle neccâriyesi beher zirâ‘ yirmi beşer akçeden yedi yüz akçe, dokuz kademeli nerdübân direkleriyle neccâriyesi sekiz yüz akçe, müceddeden kenîf kaygan döşeme ve tahta perdeleriyle neccâriyesi bin akçe ki cem‘an yirmi sekiz bin yüz seksen akçeye tahammülü vardır, noksân ile olmak mümkün değildir deyu ittifâk ettiklerini mevlânâ-yı mezbûr mahallinde tahrîr ba‘dehû gelip meclis-i şer‘de takrîr ettikden sonra menzil-i mezkûrun sâbıkā müste’ciri olan Mustafa Bey b. Mehmed on dokuz bin yedi yüz altmış akçe icâre-i mu‘accelesini mezbûre Çeşmisiyah Hatun yedinden mukābele-i ferâğda kabz etmeğle mezbûrenin mecmû‘ icâre-i mu‘accelesi kırk yedi bin dokuz yüz kırk akçe olduğu mütehakkık olmağla icâre-i müeccele olan meblağ-ı mezbûrdan beher yevm iki akçesini menzil-i mezkûrun ba‘de’l-yevm ta‘mîrine sarf etmek üzere mütevellî-i mûmâ-ileyh iki akçesini tenzîl edip mezbûre Çeşmisiyah Hatun yedine temessük vermeğin mâ-hüve’l-vâkı‘ bi’t-taleb ketb olunup mezbûre yedine def‘ olundu. Hurrire fi’l-yevmi’l-hâmis ve’l-ışrîn min-Cemâziyelâhire li-sene sitte ve selâsîn ve elf. Şühûdü’l-hâl: Dilaver Bey b. Abdullah el-bevvâbü’s-sultânî, Mahmud Bey b. ( ) el-bevvâbü’s-sultânî, Yusuf Bey b. Abdullah el-bevvâbü’s-sultânî, Ali Bey b. Abdullah el-bevvâbü’s-sultânî, Halil Bey b. ( ) el-bevvâbü’s-sultânî.