Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 517 Hüküm no: 456 Orijinal metin no: [149b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Hasan mahallesinden Ayşe Hatun’un kocasından intikal eden Medine-i Münevvere Evkafı’na ait evin tasarruf hakkını annesi Emine Hatun bt. Mehmed’e satması Dârü’s-saltanati’s-seniyye Kostantıniyyeti’l-mahmiye’de el-Hâc Hasan mahallesinde sâkin iken vefât eden Ebubekir Efendi b. Davud’un sulbiye kebîre kızı fahrü’l-muhadderât Âişe Hatun tarafından husûs-ı âti’l-beyâna vekîl olup vekâleti hasm-ı şer‘-i câhid mahzarında mezbûreyi ma‘rifet-i şer‘iyye ile ârifân olan Mehmed Çelebi b. Osman ve Mustafa b. Ahmed nâm kimesneler şehâdetleriyle sâbite olan zevci Mustafa Efendi b. el-Hâc Hasan el-Müderris meclis-i şer‘de işbu râfi‘atü’l-kitâb müvekkile-i mezbûrenin vâlidesi Emine Hatun bt. Mehmed muvâcehesinde bi’l-vekâle ikrâr ve takrîr-i kelâm edip Medîne-i Münevvere -sallallâhü te‘âlâ alâ-münevvirihâ- Evkāfı’ndan olup mahalle-i merkūmede vâki‘ bir tarafı Ahmed Çelebi b. Abdi mülkü ve bir tarafı Muslihiddin Vakfı ve bir tarafı kâfirin binâ ve bir tarafı tarîk-i âm ile mahdûd fevkānî ve tahtânî evleri ve bi’r-i mâ’î ve kenîf ve muhavvatayı müştemil olan vakf menzilin icâre-i mu‘accele ve müeccele ile hakk-ı tasarrufu müteveffâ-yı merkūm Ebubekir Efendi yedinde olup ba‘de vefâtihî bi-hasebi’l-kānûn menzil-i mezkûrun hakk-ı tasarrufu müvekkilem mezbûre Âişe Hatun’a intikāl etmekle müvekkilem mezbûre dahi menzil-i mezkûrun hakk-ı tasarrufunu vakf-ı mersûm mütevellîsi ma‘rifetiyle mesfûre Emine Hatun’a tefvîz edip ol dahi tefevvüz ve kabûl ettiğinden sonra mesfûre Emine Hatun dahi mukābele-i tefvîzde müteveffâ-yı merkūmun yirmi bin akçe düyûn-ı müsbitesini edâya müte‘ahhid oldu dedikde gıbbe’t-tasdîk mâ-hüve’l-vâkı‘ gıbbe’t-taleb ketb olundu. Hurrire fî-evâhiri Cemâziyelâhire sene 1037 Şühûdü’l-hâl: Kıdvetü’l-mevâliyi’l-izâm İbrahim Efendi b. Halil, Selim Bey b. Abdi el-cündî, Ahmed Beşe b. Mehmed er-râcil, Mustafa Çelebi b. Osman, Mustafa Beşe b. Mahmud er-râcil, Sinan Efendi el-kādî, Osman Beşe b. Nimet er-râcil, Ali Bey b. Abdullah el-bevvâb ve gayruhüm.