Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 517 Hüküm no: 457 Orijinal metin no: [150a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirahor-ı Evvel Ebubekir Ağa b. Hasan’ın Haremeyn Vakfı’na ait Hoca Rüstem mahallesindeki oturduğu evi tamir ettirmesi ve keşfi Dârü’s-saltanati’s-seniyye Kostantıniyyeti’l-mahmiye’de Hoca Rüstem mahallesinde fahrü erbâbi’d-devleti’l-garrâ zahrü erbâbi’r-rütbeti’l-ulyâ râkib-i huyûl-i izz ü ikbâl sâhib-i züyûl-i mecd ü iclâl fâris-i meydân-ı cûd [u] kerem çâbuk-ı süvvâr-ı meydân-ı himem el-mahfûfu bi-sunûfi avâtifi’l-meliki’l-a‘lâ bi’l-fi‘il mîrâhûr-ı evvel olan Ebubekir Ağa b. Hasan meclis-i şer‘-i şerîf-i envere gelip evkāf-ı mezbûreden olup mahalle-i mezbûrede vâki‘ inde’l-cîrân ma‘lûmü’l-hudûd olup icâre-i mu‘accele ve müeccele mutasarrıf olduğum vakıf menzil mürûr-ı eyyâm ve kürûr-ı a‘vâm ile harâb olup kābil-i intifâ‘ olmamağla menzil-i mezkûru icâre-i mu‘acceleye mahsûb olmak üzere mukaddemâ ma‘rifet-i mütevellî ve izn-i şer‘le ta‘mîr etmiş idim. El-hâletü hâzihî savb-ı şer‘den üzerine varılıp menzil-i mezkûrda müceddeden imâret eylediğim ebniyenin ne mikdâr akçeye tahammülü vardır, takvîm-i sahîh ile takvîm ve tahmîn olunmak matlûbumdur dedikde atebe-i aliyyeden reîs-i mi‘mârân-ı hâssa olan kıdvetü’l-emâcid ve’l-ekârim umdetü’l-efâhim ve’l-e‘âzim Hasan Ağa b. Abdüddâim ve zeyl-i sütûrda isimleri mastûr olan Müslimîn ile üzerine varılıp mu‘âyene olundukda fi’l-hakīka menzil-i mezkûrun muhavvata-i hâriciyyesinde vâki‘ bennâ zirâ‘ıyla tûlen altı buçuk ve arzen dört zirâ‘ bâ-hesâb-ı şatrancî yirmi altı zirâ‘ münakkaş sıvalı şehnişînin sakf ve tavan ve billûr cam ve demirli pencereleri ve döşemesi beher zirâ‘ dört yüz ellişer akçeden on bir bin yedi yüz akçe ve elvâhdan masnû‘ bir âsiyâb dolabı üç yüz elli akçe ve tûlen dört zirâ‘ ve arzen dört zirâ‘ bi-hesâb-ı şatrancî on altı zirâ‘ hazîne odasının sakf ve tavan ve döşeme ve sâiri beher zirâ‘ üçer yüz ellişer akçeden beş bin altı yüz akçe, tûlen yirmi bir buçuk arzen beş zirâ‘ bi-hesâb-ı şatrancî yüz yedi buçuk zirâ‘ dahlîz-i cedîdin sakf ve döşeme ve muh-ı? tavan ve sâiri beher zirâ‘ yüz seksener akçeden on dokuz bin iki yüz yirmi akçe ve nerdübân sahanı üzerinde tûlen altı buçuk ve arzen altı zirâ‘ bi-zirâ‘ı şatrancî otuz dokuz zirâ‘ sakfın döşeme ve mertek ve padavra ve kiremidi beher zirâ‘ yüz seksener akçeden yedi bin yirmi akçe, tûlen on üç ve arzen üç zirâ‘ bi-hesâb-ı şatrancî kırk beş buçuk zirâ‘ tahta turre beher zirâ‘ kırkar akçeden bin sekiz yüz yirmi akçe ve büyük kapının tûlen on üç ve arzen altı buçuk zirâ‘ bi-hesâb-ı şatrancî seksen dört buçuk zirâ‘ sakfın beher zirâ‘ altmış beşer akçeden beş bin dört yüz doksan iki akçe, umkan on kulaç taş ile binâ olunmuş bi’r-i mâ beher kulaç üçer yüz altmışar akçeden üç bin beş yüz akçe, seng-i bilezik ve ağızlık ve safası bin iki yüz akçe ve tûlen on sekiz zirâ‘ ve arzen yirmi zirâ‘ bi-hesâb-ı şatrancî üç yüz altmış zirâ‘ tas kaldırım beher zirâ‘ on birer akçeden üç bin dokuz yüz altmış akçe ve on kademe nerdübân seng-i kûfeği dört yüz elli akçe ve üç aded küp maslak safası ile iki bin dört yüz akçe, tûlen üç arzen üç kadden dört zirâ‘ bi-hesâb-ı şatrancî seksen arpa anbârı beher zirâ‘ ellişer akçeden dört bin akçe ve tûlen elli ve arzen dört hesâb-ı mezkûr ile iki yüz zirâ‘ harpuşta asma çardağı beher zirâ‘ otuz beşere akçeden sekiz bin akçe ve iki tarafı tûlen yüz kırk zirâ‘ ve kadden iki zirâ‘ bi-hesâb-ı şatrancî iki yüz zirâ‘ bahçe trabzanı asmasıyla beher zirâ‘ yirmi sekizer akçeden yedi bin sekiz yüz kırk akçe ve elvâhdan masnû‘ bi-hesâb-ı şatrancî yüz altı zirâ‘ dört bâb hücrenin döşeme ve kirişlemesiyle beher zirâ‘ seksener akçeden sekiz bin dört yüz seksen akçe, tûlen dokuz zirâ‘ ve arzen yedi zirâ‘ bi-hesâb-ı şatrancî altmış üç zirâ‘ hazîne odasının döşeme ve kirişleme ve penceresi dokuz bin dört yüz elli akçe, iki kenîf tahta perdesiyle bin iki yüz akçe, tûlen altı buçuk kadden dört zirâ‘ bi-hesâb-ı şatrancî yirmi altı zirâ‘ taş duvarın beher zirâ‘ seksener akçeden iki bin seksen akçe ve muhavvata-i dâhiliyyede hesâb-ı mezkûrla elli bir zirâ‘ pâye-i duvar ma‘a kemer kapı tuğla kârgîr beher zirâ‘ yüz yirmi beşer akçeden elli bin yüz yirmi akçe ve yüz seksen altı zirâ‘ sütûn-ı kebîr ve taban ve başlığı ve destek beher zirâ‘ otuzar akçeden beş bin beş yüz seksen akçe ve cânib-i garbîde tûlen ve arzen beş yüz kırk altı zirâ‘ taş duvar beher zirâ‘ seksen akçeden kırk üç bin altı yüz seksen akçe ve yirmi aded seng-i âteş kürsi-yi kebîr yüz yirmişer akçeden iki bin dört yüz akçe ve defa on kulaç bi’r-i mâ üçer yüz ellişer akçeden üç bin beş yüz akçe ve ağızlık ve sâiri bin iki yüz akçe ve yirmi yedi kulaç müdeddeden kârîz beher kulaç yüz seksener akçeden dört bin sekiz yüz altmış akçe, tûlen on yedi zirâ‘ ve arzen on dokuz zirâ‘ bi-hesâb-ı şatrancî üç yüz yirmi üç zirâ‘ cedîd musanna‘ ve mükemmel odaların sakf ve tavan ve pencere ve billûr camları beher zirâ‘ beşer yüz akçeden yüz altmış bir bin beş yüz akçe, tûlen beş zirâ‘ ve arzen beş zirâ‘ bi-hesâb-ı şatrancî yirmi beş zirâ‘ mutallâ kubbeli mükemmel oda beher zirâ‘ beşer yüz akçeden on iki bin beş yüz akçe, tûlen on bir ve arzen on bir bi-hesâb-ı şatrancî yüz yirmi bir zirâ‘ fevkānî kasrın sakf ve döşeme ve kirişleme ve pencere ve kafes ve kaygan döşemesi beher zirâ‘ dörder yüz ellişer akçeden elli dört bin dört yüz elli akçe, tûlen on bir ve arzen dokuz zirâ‘ bi-hesâb-ı şatrancî doksan dokuz zirâ‘ hazîne odası beher zirâ‘ [150b] üçer yüz elli akçeden otuz dört bin altı yüz elli akçe, tûlen altı kadden iki ve arzen iki bi-hesâb-ı şatrancî yirmi dört zirâ‘ çatma anbâr beher zirâ‘ ellişer akçeden bin iki yüz akçe, tûlen yirmi dört devren üç zirâ‘ bi-hesâb-ı şatrancî yetmiş iki zirâ‘ kârgîr kapı ve kenîf beher zirâ‘ ellişer akçeden üç bin altı yüz akçe ve hesâb-ı mezkûr ile kırk sekiz zirâ‘ kaygan kenîf döşemesi ve sakf ve kapısı beher zirâ‘ yüzer akçeden dört bin sekiz yüz akçe ve iki fırın ve sakfı ve ocak ber-vech-i maktû‘ altı bin akçe ki cem‘an dört yüz kırk sekiz bin yedi yüz yetmiş akçe ile ancak olur, ekal ile olmak mümkün değildir deyu ittifâk ettiklerinden sonra ağa-yı müşârun-ileyh hazretleri iâde-i kelâm edip menzil-i mezkûrda mukaddemâ ihdâs ettiğim ebniyeye ba‘de’t-tahmîn yüz seksen bin iki yüz on beş akçe dahi harc u sarf etmiş idim deyu Müfettiş Yusuf Efendi imzâsıyla müm[zâ] ve hatemi ile mahtûm bin otuz bir senesi Cemâziyelâhire’si evâhiri ile müverrah hüccet-i şer‘iyye ibrâz etmeğle müşârun-ileyh ağa hazretlerinin menzil-i mezkûra mecmû‘ harc u sarfları altı yüz yirmi sekiz bin dokuz yüz seksen beş akçe olduğu mütehakkık olmağın meblağ-ı mezbûr icâre-i mu‘acceleye mahsûb olmak üzere mâ-hüve’l-vâkı‘ bi’t-taleb ketb olundu. Hurrire fî-evâhiri Cemâziyelâhire sene sitte ve selâsîn ve elf. Şühûdü’l-hâl: Fahrü’l-müderrisîni’l-kirâm İshak Efendi, fahrü’l-akrân Abdullah Ağa b. ( ) Kethüdâ-yı Istabl-ı Hâssa, Mehmed Ağa b. Mustafa Rahtvân, Bâli Bey b. Mehmed Kürsüdâr, Mehmed Ağa b. Hürrem Emîn-i Cev, Mehmed Bey b. Hasan Seroda, el-Hâc Geyvan Bey b. ( ) ani’s-serrâci’s-sultânî, Ali beşe b. Abdullah er-râcil, Mahmud Bey b. Abdullah Râh-ı Âbî, Perviz b. Abdullah, İbrahim b. Mustafa es-serrâcü’s-sultânî, Mehmed Bey b. ( ) es-serrâc, Ali Bey b. Abdullah el-bevvâb-ı sultânî ve gayruhüm.