Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 520 Hüküm no: 458 Orijinal metin no: [150b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirahor-ı Evvel Ebubekir Ağa b. Hasan’ın Haremeyn Vakfı’na ait Hoca Rüstem mahallesindeki oturduğu evi tamir ettirmesi Dârü’s-saltanati’s-seniyye Kostantıniyyeti’l-mahmiye’de Hoca Rüstem mahallesinde sâkin fahrü erbâbi’d-devleti’l-garrâ zahrü erbâbi’r-rütbeti’l-ulyâ zü’l-kadri’r-refî‘ ve’l-câhi’l-menî‘ el-mahfûfu bi-sunûfi avâtifi’l-meliki’l-a‘lâ bi’l-fi‘il mîrâhûr-ı evvel olan Ebubekir Ağa b. Hasan meclis-i şer‘-i şerîfe gelip takrîr-i kelâm edip evkāf-ı mezbûreden olup mahalle-i mezbûrede vâki‘ inde’l-cîrân ma‘lûmü’l-hudûd olup icâre-i mu‘accele ve müeccele ile mutasarrıf olduğum vakıf menzil mürûr-ı eyyâm ile harâb olup kābil-i intifâ‘ olmamağla menzil-i mezkûrun bir mikdârın izn-i şer‘ ile ta‘mîr etmiş idim, hâlâ yine menzil-i mezkûrun dâhiliyyesi şimâlinde olan fevkānî ve tahtânî dört bâb odalar ve matbah ve kîlârı ve hâriciyyesinde ahır üzerinde olan odaları dahi harâb olmuşdur, savb-ı şer‘den üzerine varılıp zikr olunan harâbe odaların nıkzı tahmîn oldukdan sonra icâre-i mu‘acceleye mahsûb olmak üzere kendi mâlımdan imâret ve meremmetine izin verilmek matlûbumdur dedikde atebe-i aliyyeden reîsü’l-mi‘mârân fahrü’l-akrân Hasan Ağa b. Abdülmennan ve zeyl-i sütûrda isimleri mastûr olan Müslimîn ile üzerine varılıp mu‘âyene olundukda fi’l-hakīka bennâ zirâ‘ıyla tûlen elli altı zirâ‘ ve arzen otuz üç zirâ‘ bâ-hesâb-ı şatrancî bin sekiz yüz kırk sekiz zirâ‘ muhavvata-i dâhiliyyesinde dört bâb fevkānî ve tahtânî mezkûr odaların nıkzı yirmi sekiz bin akçe, tûlen yirmi dokuz zirâ‘ ve arzen dokuz zirâ‘ hebâb-ı mezkûr ile iki yüz altmış bir zirâ‘ ahır üzerinde olan harâbe mezkûr odaların nıkzı on bin akçe ve tûlen elli zirâ‘ ve kadden altı zirâ‘ hesâb-ı şatrancî üzere üç yüz zirâ‘ muhavvateyn beyninde olan taş duvarın nıkzı iki bin akçe ki cem‘an kırk bin akçeye ancak tahammülü vardır deyu ittifâk ettiklerinde vech-i muharrer üzere icâre-i mu‘acceleye mahsûb olmak üzere mezkûr odaların ta‘mîrine ağa-yı müşârun-ileyh hazretlerine izin birle mâ-hüve’l-vâkı‘ bi’t-taleb ketb olundu. Hurrire fi’t-târîhi’l-mezbûr. Şühûdü’l-hâl: es-Sâbıkūn.