Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 102 Hüküm no: 22 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Behram b. İbrahim’in terekesinin vârisler arasında paylaşılması Fi’l-asl vilâyet-i Anadolu’da medîne-i Kayseriye’de vâki‘ kal‘a dâhili sükkânından olup mahrûse-i Galata’ya tâbi‘ kasaba-i Tophâne’de Çukur Câmi‘i mahallesinde mütemekkin iken bundan akdem vefât eden Behram b. İbrahim nâm kimesnenin verâseti zevce-i metrûkesi Fâtıma bt. Sefer’e ve sulbiye sagīre kızı Âişe’ye ve anası diğer Âişe’ye ve li ebeveyn er karındaşı olup zikr olunan kal‘a dâhilinde sâkin Süleyman’a ve li ebeveyn kız karındaşı Sultan’a münhasıra olup kable’l-kısme merkūme Fâtıma dahi fevt olup verâseti sadriye kızı mezbûre Âişe’ye ve vâlidesi Ümmühâni bt. Abdullah’a ve babası Sefer’e münhasıra olup kable’l-kısme sagīre-i mezbûre Âişe dahi fevt olup verâseti anasının anası mezbûre Ümmühâni ile babasının anası mezbûre diğer Âişe’ye ve li ebeveyn ammi mezbûr Süleyman’a münhasıra ve bi tarîki’l-münâsaha tashîh-i mes’eleleri beş yüz yetmiş olup yirmi dört sehmi mezbûr Sefer’e ve otuz dokuz sehmi mezbûre Ümmühâni’ye ve yüz yirmi üç sehmi babasının anası mezbûre diğer Âişe’ye ve üç yüz elli sehmi mezbûr Süleyman’a ve kırk sehmi mezbûre Sultan’a isâbet ettiği şer‘an sâbit ve mütehakkik oldukdan sonra mezbûr Süleyman tarafından husûs-ı âti’l-beyâna vekîl olduğu hasm-ı câhid-i şer‘î mahzarında sâbit olan Ahmed Ağa b. Osman nâm kimesne meclis-i şer‘de mezbûre Ümmühâni mahzarında üzerine da‘vâ ve takrîr-i kelâm edip tereke-i müteveffâ-yı evvel-i mezbûra cümleten mezbûre Ümmühâni vaz‘-ı yed etmekle suâl olunup tereke-i müteveffâ-yı evvel-i mezbûrdan müvekkilim mezbûr Süleyman’ın sihâm-ı mezbûreden üç yüz elli sehim hissesi bana teslîme mezbûre Ümmühâni’ye tenbîh olunmak matlûbumdur dedikde gıbbe’s-suâl mezbûre Ümmühâni kaziyye minvâl-i muharrer üzre olup verâsetini ikrâr etmeğin mâ vaka‘a ketb olundu. Fi’l-yevmi’s-sâlis ve’l-ışrîn min Rebî‘ilâhir li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, İbrahim Çelebi, Hasan Çelebi, Receb Çelebi.