Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 522 Hüküm no: 460 Orijinal metin no: [151b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hüseyin’in tasarrufundaki vakıf evi Ali Ağa Vakfı mütevellisi Mustafa Bey b. Abdullah’tan aldığı borca karşılık rehin göstermesi Mahmiye-i Kostantıniyye’de Sarây-ı Atîk kurbünde vâki‘ Mercan Ağa mahallesinde sâkine Âişe Hatun bt. Hüseyin meclis-i şer‘-i şerîfde mahmiye-i mezbûrede Medîne-i Münevvere Evkāfı’na bi’l-fi‘il mütevellî olan mefharü’l-emâsil ve’l-a‘yân İsmail Çelebi b. ( ) mahzarında takrîr-i da‘vâ edip vakf-ı merkūmdan olup mahalle-i mezbûrede bir tarafı vakf-ı mezbûr ve bir tarafı Çavuş Vakfı ve bir cânibi mahalle-i mezbûre mescidine vakıf menzil ve bir cânibi tarîk-i âm ile mahdûd olan vakıf menzilin hakk-ı tasarrufu icâre-i mu‘accele ve müeccele ile babam mezbûr Hüseyin yedinde iken mukaddemâ vâki‘ olan harikda menzil-i mezkûr muhterik olmağın arsası üzerine babam mezbûr Hüseyin izn-i mütevellî ile kendi mâlından nefsi için cedîd menzil binâ edip ba‘de vefâtihî bana intikāl ettikde binâsı mülküm olan menzil-i mezkûru Ali Ağa Vakfı’na mütevellî olan Mustafa Bey b. Abdullah nâm cündîden istikrâz ettiğim seksen bin atîk akçe mukābelesinde mütevellî-i mezbûr Mustafa Bey’e rehin vaz‘ edip ol dahi irtihân ve kabûl ettikde yine mezbûr Mustafa Bey vakıf arsa üzerinde olan ebniyenin rehni sahîh değildir, menzil-i mezkûru meblağ-ı mezbûr mukābelesinde bana tefvîz ile meblağ-ı mezbûru ibkā ettikde menzil-i mezkûra yine sen mutasarrıfe ol deyu takrîr edip ben dahi menzil-i mezkûru mezbûr Mustafa Bey’e tefvîz edip ba‘dehû mezbûr Mustafa Bey bilâ-veled vefât etmekle sâbıkā Haremeyn-i Şerîfeyn mütevellîsi olan Ömer Ağa menzil-i mezkûr mahlûldur, âhara îcâr ederim deyu beni tahvîf edip yedimden hakk-ı sükût kırk bin akçemi bî-vech alıp vakf-ı mezbûrun muhâsebe defterine kayd etmişdir, hâlâ meblağ-ı mezbûru mütevellî-i merkūm İsmail Çelebi’den taleb ederim, suâl olunsun dedikde gıbbe’s-suâl mütevellî-i mezbûr cevâbında fi’l-hakīka menzil-i mezkûru mezbûre Âişe Hatun mütevellî-i mezbûr Mustafa Bey’e tefvîz edip ba‘de vefâtihî mahlûlünden mütevellî-i sâbık mezbûr Ömer Ağa menzil-i mezkûru yine mezbûreye yirmi bin akçeye îcâr edip vakfın muhâsebe defterine kayd etmişdir, ebniye-i mezkûre vech-i muharrer üzere mülkü olup mütevellî-i mezbûr Mustafa Bey’e rehin vaz‘ ettiği ma‘lûmum değildir deyicek, mezbûre Âişe Hatun’dan takrîrine muvâfık beyyine taleb olundukda udûl-ı Müslimînden Mustafa Halîfe b. Mehmed ve el-Hâc Mehmed b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ ebniye-i mezkûreyi mezbûre Âişe’nin babası müteveffâ-yı mezbûr hâl-i hayâtında izn-i mütevellî ile kendi mâlından nefsi için ihdâs edip ba‘de vefâtihî mezbûreye intikāl etmekle mezbûre dahi meblağ-ı mezbûr seksen bin atîk akçe mukābelesinde mütevellî-i mezbûr Mustafa Bey’e bizim huzûrumuzda rehin vaz‘ edip ol dahi irtihân ve kabz u kabûl etti, husûs-ı mezbûra biz şâhidleriz, şehâdet dahi ederiz deyu edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın mâ-hüve’l-vâkı‘ bi’t-taleb ketb olundu. Hurrire fî-evâsıtı Şa‘bâni’l-mu‘azzam sene sitte ve selâsîn ve elf. Şühûdü’l-hâl: Mehmed Bey b. Ahmed el-mütevellî, Mehmed Çelebi b. Gazanfer el-bevvâbü’s-sultânî, İskender b. Carullah, Ali Çelebi b. Hızır, Mustafa Çelebi b. Mehmed el-kâtib ve gayruhüm.