Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 523 Hüküm no: 461 Orijinal metin no: [151b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Subaşı mahallesinden Rukiye bt. Hasan’ın Medine-i Münevvere Evkafı’na ait evi kiralaması Mahmiye-i Kostantıniyye’de Abdi Subaşı mahallesinde sâkine Rukiye bt. Hasan nâm hatun meclis-i şer‘a gelip takrîr-i kelâm edip Medîne-i Münevvere -sallallâhü te‘âlâ alâ-münevvirihâ- Evkāfı’ndan olup mahalle-i mezbûrede vâki‘ bir tarafı Mehmed Efendi b. ( ) el-Kādî mülkü ve bir tarafı mahalle-i mezbûre câmi‘i ve bir tarafı Mehmed Çelebi b. Selami mülkü ve bir tarafı tarîk-i âm ile mahdûd olup muhavvata-i hâ[ri]ciyyesi fevkānî bir odayı ve muhavvata-i dâhiliyyesi fevkānî iki bâb odayı ve matbah ve ahırı ve iki bi’r-i mâ ve cüneyneyi müştemil olan vakıf menzili zevcim Osman Şahin Bey icâre-i mu‘accele ve müeccele ile mutasarrıf olup ba‘de vefâtihî evlâdı olmamağla menzil-i mezkûru bin otuz üç senesi Şevvâlü’l-mükerrreminin gurresinde vakf-ı mezbûra mütevellî olan Ali Bey’den ben dahi dört bin akçe icâre-i mu‘accele ve beher şehr doksan akçe icâre-i müeccele ile istîcâr edip menzil-i mezkûrda icâre-i mu‘acceleye mahsûb olmak üzere binâ ihdâsına izin birle târîh-i mezbûruyla müverrah hatem ve imzâsını müştemil bir tezkire verip yedimde olan tezkire-i mersûme zâyi‘ olmağın hâlâ vakf-ı mezbûr mütevellîsi olan İsmail Çelebi menzil-i mezkûr vech-i muharrer üzere vakf-ı merkūm defterinde üzerimde mukayyed bulunmağın târîh-i kitâb şehri evâili ile müverrah yedime hatem ve imzâsını müştemil tezkire vermişdi, el-hâletü hâzihî nazar olunup mûcebince savb-ı şer‘den dahi hüccet-i şer‘iyye verilmek matlûbumdur dedikde gıbbe’n-nazar mezbûrenin yedinde olan tezkireye nazar olunup mazmûnu takrîrine muvâfık bulunmağın mâ-hüve’l-vâkı‘ bi’t-taleb ketb olundu. Hurrire fi’t-târîhi’l-merkūm. Şühûdü’l-hâl: Ali Bey b. Abdullah el-bevvâb, Mustafa Çelebi b. Mehmed el-kâtib, İsmail Çelebi b. Abdi el-kâtib, el-Hâc İbrahim Çelebi ve gayruhüm.