Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 524 Hüküm no: 462 Orijinal metin no: [152a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Paşa mahallesinden Rıdvan Ağa b. Abdüddâim’in tasarrufunda olan Ortaköy’deki vakıf bahçeyi Mehmed Ağa’ya satması Dârü’s-saltanati’s-seniyye Kostantıniyyeti’l-mahmiye’de Mahmud Paşa mahallesinde sâkin kıdvetü’l-emâcid ve’l-ekârim umdetü’l-efâhim ve’l-e‘âzım Rıdvan Ağa b. Abdüddâim el-Müteferrika meclis-i şer‘de bâ‘isü hâze’r-rakīm atebe-i aliyyede bi’l-fi‘il mîrâhûr-ı kebîr olan fahr-ı erbâb-ı mefâhir zahr-ı ashâb-i me’âsir râkib-i huyûl-i izz ü ikbâl sâhib-i züyûl-i mecd ü iclâl fâris-i arsa-i cûd [u] kerem çâbuk-süvâr-ı meydân-ı himem Mehmed Ağa b. ( ) hazretleri kıbelinden husûs-ı âti’l-beyânı tasdîka vekîl olup vekâleti nehc-i şer‘iyy-i mu‘teber üzere sâbite olan Mustafa Çelebi b. İskender mahzarında ikrâr u i‘tirâf edip Medîne-i Münevvere-i Fâhire -şerrefehallâhü te‘âlâ ilâ-yevmi’l-âhire- Evkāfı’ndan olup mahrûsa-i Galata muzâfâtından Ortaköy nâm mevzi‘de vâki‘ bir tarafı merhûm Derviş Ağa eytâmı mülkü ve iki tarafı yine vakf-ı mezbûrdan bağ ile bahçe ve bir tarafı sâhil-i bahr ile mahdûd üç su kuyusunu ve bir kârgîr zindânı ve bir kapılı limanı ve yedi ocaklı odaları ve hamâm ve kürûm ve mâ-i cârî ve kenîfi müştemil icâre-i mu‘accele ve beher yevm on akçe icâre-i müeccele ile mutasarrıf olduğum vakıf hadîkanın hakk-ı tasarrufunu vakf-ı mezbûr mütevellîsi ma‘rifetiyle müvekkil-i müşârun-ileyh Mehmed Ağa hazretlerine tefvîz edip ol dahi tefevvüz ve kabûl ettiğinden sonra mukābele-i tefvîzde müvekkil-i müşârun-ileyh yedinden beş yük otuz bin akçeyi tamâmen alıp kabz ettim, ba‘de’l-yevm hadîka-i merkūmeye müvekkil-i müşârun-ileyh mutasarrıf olsun dedikde mukırr-ı merkūm Rıdvan Ağa’yı ikrâr-ı meşrûhunda vekîl-i mesfûr Mustafa Çelebi bi’l-müvâcehe tasdîk etmeğin mâ-hüve’l-vâkı‘ gıbbe’t-taleb ketb olundu. Hurrire fî-evâsıtı şehri Ramazâni’l-mübârek sene sitte ve selâsîn ve elf. Şühûdü’l-hâl: Hüseyin Efendi b. Ali Kâtib-i Yeniçeriyân-ı sâbık, Abdullah Çelebi b. Bâli Kethüdâ-i Istabl-ı Büzürg, Mustafa Çelebi b. Mehmed Kethüdâ-i Istabl-ı Küçük, Ali Çelebi b. Abdi Kâtib-i Serrâcân ve gayruhüm.