Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 527 Hüküm no: 464 Orijinal metin no: [152b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Evkafı mütevellisi İsmail Çelebi’nin vefat eden eski câbî Mehmed Bey’de kalan vakfın alacağını hanımı Hatice bt. Ahmed’den istemesi Sebeb-i tahrîr-i kitâb-ı şer‘î budur ki, Dârü’s-saltanati’s-seniyye Kostantıniyyeti’l-mahmiye’de vâki‘ Medîne-i Münevvere -sallallâhü alâ-men şerrefehâ- Evkāfı’na mütevellî olan fahrü’l-emâsil ve’l-akrân İsmail Çelebi b. Mehmed meclis-i şer‘-i şerîf-i enverde vakf-ı mezbûr câbîsi olup mahmiye-i merkūmede Ma‘cûnî Kasım mahallesinde sâkin iken bundan akdem vefât eden Mehmed Bey b. Gazanfer’in zevce-i metrûkesi Hadice bt. Ahmed nâm hatun mahzarında üzerine takrîr-i da‘vâ edip müteveffâ-yı mezbûr Mehmed Bey vakf-ı mezbûr câbîsi olmağla mütevellî-i sâbık zamânında vakf-ı merkūm icârâtından altmış bin akçe ve zamân-ı tevliyetimde yirmi bin akçe cem‘an seksen bin akçe cem‘ ve tahsîl ve defter edip vakf-ı merkūma îfâ ve teslîm etmemekle meblağ-ı mezbûr zimmetinde bâkī kalmışdı, hâlâ mersûme Hadice Hatun’dan müteveffâ-yı mezbûrun muhallefâtına vaz‘-ı yed eyledi deyu meblağ-ı merkūmu mersûme Hadice Hatun’dan taleb ederim, suâl olunsun dedikde gıbbe’s-suâl mersûme Hadice Hatun cevâbında fi’l-hakīka zevcim müteveffâ-yı mezbûr Mehmed Bey ism-i mâl ıtlâk olunur muhallefât terk etmemekle ben muhallefâtına vaz‘-ı yed etmedim deyicek mütevellî-i merkūmdan takrîrine muvâfık beyyine taleb olundukda ityân-ı beyyineden âciz olmağın mütevellî-i merkūm İsmail Çelebi vech-i muharrer üzere mersûme Hadice Hatun müteveffâ-yı mezbûrun akār ve nükūduna ve sâir muhallefât-ı menkūlesine vaz‘-ı yed etmediğine istihlâf olunsun dedikde mersûme Hadice Hatun dahi alâ-vefkı’l-mes’ûl half billâhi te‘âlâ etmeğin mütevellî-i merkūm da‘vâdan men‘ olunup mâ-hüve’l-vâkı‘ bi’t-taleb ketb u imlâ olundu. Hurrire fî-evâhiri Zilka‘deti’ş-şerîfe sene sitte ve selâsîn ve elf. Şühûdü’l-hâl: Abdurrahman Bey b. Abdullah el-bevvâbü’s-sultânî, Mehmed Efendi b. Muharrem el-mülâzım, Ali Bey b. Abdullah el-bevvâb, Hüseyin Bey b. Abdullah, Mustafa Halîfe b. ( ) el-imâm, Bestan b. Hasan et-Tâcir, Ali Çelebi b. Halil el-mi‘mâr ve gayruhüm.