Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 529 Hüküm no: 466 Orijinal metin no: [153a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı’na ait Kızılminare mahallesindeki evi Siyami Efendi b. Himmet’in kiralaması Atebe-i Aliyye-i Hâkānî’de mensûhât küttâbı halîfesi olan bâ‘isü hâze’r-rakīm kıdvetü erbâbi’t-tahrîr ve’r-rakīm zübdetü ashâbi’t-takrîr ve’l-kalem Siyami Efendi b. Himmet meclis-i şer‘-i şerîf-i şâmihü’l-imâda gelip takrîr-i kelâm ve ta‘bîr ani’l-merâm edip mahmiye-i Kostantıniyye’de Kızılminare mahallesinde sâkin iken bundan akdem vefât eden merhûm Abdulbâki Efendi mahalle-i mezbûrda vâki‘ bir tarafı Abdi Çelebi b. Mustafa ve Kerime Hatun bt. Hasan mülkü ve bir cânibi Sîmkeş el-Hâc Yusuf b. Abdullah mülkü ve bir cânibi Ali Subaşı ve Başçı Hasan Çelebi mülkleri ve bir cânibi tarîk-i âm ve Ali Çavuş mülkü ile mahdûd ve muhavvata-i dâhiliyyesi bir oda ve kîlâr ve matbah ve cüneyne-i zât-ı eşcâr-ı müsmire ve muhavvata-i hâ[ri]ciyyesi bir camlı oda ve içinde havuz ve tahtânî fevkānî odaları müştemil olan mülk menzilini hâl-i sıhhatinde vakf edip vakfiye-i ma‘mûlün-bihâsında men[zil]-i mezkûrun süknâsı evvelâ nefsine ba‘dehû evlâdına ve evlâd-ı evlâdına, ba‘dehüm zevcesi Fâtıma Hatun ve ba‘dehâ Haremeyn-i Şerîfeyn fukarâsına tasarrufunu şart ve tansîs edip hâlâ meşrûtün-leh olanlar münkarız olmağla menzil-i mezkûru mahmiye-i merkūmede Haremeyn-i Şerîfeyn mütevellîsi olan İsmail Çelebi zabt ve tâlibine arz edip ragabât-ı nâs münkatı‘a oldukda otuz beş bin akçe icâre-i mu‘accele ve beher şehr otuz akçe icâre-i müeccel ile üzerimde karâr etmeğin tûlen ve arzen bâ-hesâb-ı şatrancî bin on iki zirâ‘ arsa üzerinde olan menzil-i mezkûru mütevellî-i mezbûr meblağ-ı mersûm ile bana îcâr edip ben dahi istîcâr ve kabûl ettikden sonra mütevellî-i mesfûr târîh-i kitâb şehr-i evâsıtı ile müverrah hatem ve imzâsını müştemil yedime tezkire vermişdi, el-hâletü hâzihî tezkireye nazar olunup mûcebince savb-ı şer‘den hüccet-i şer‘iyye verilmek matlûbumdur dedikde mûmâ-ileyh Siyami Efendi’nin yedinde olan mütevellî tezkiresine nazar olunup mazmûnu takrîrine muvâfık bulunmağın mâ-hüve’l-vâkı‘ bi’t-taleb [ketb] olundu. Hurrire fi’l-yevmi’s-sâdis ve’l-ışrîn mine’l-Muharremi’l-harâm li-sene seb‘a ve selâsîn ve elf. Şühûdü’l-hâl: Fahrü’l-akrân Ali Bey b. Abdullah el-bevvâb, Ali Çelebi b. Hâzır el-câbî, Mustafa Çelebi b. Mehmed el-kâtib, İbrahim Bey b. Mustafa el-câbî ve gayruhüm.