Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 531 Hüküm no: 468 Orijinal metin no: [154a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Bayezid mahallesinden Kerime Hatun bt. Mustafa’nın evini vakfetmesi Hamd-i bî-ad ve şükr-i müebbed ol vâkıf-ı zamâyir ve kâşif-i serâyir hazretlerinin dergâh-ı izzet-destgâhına ref‘ olunur ki, hallâk-ı âlem ve rezzâk-ı benî Âdemdir ve dürûd u selâm ol seyyid-i enâm ve seyyid-i havâss u avâm hazretlerinin merkad-i münevver ve meşhed-i mu‘attarlarına edâ olunur ki, şefî‘-i usât-ı ümmet ve kıble-i erbâb-ı himmetdir ve âl u evlâd ve kirâm u ashâb ahbâb-ı zevi’l-ihtirâmlarının merâkid-i aliyyelerine îsâr olunur ki, herbiri tarîk-i hayrâta dâ‘î ve hasenâta sâ‘îdir -rıdvânullâhi te‘âlâ aleyhim ecma‘în- ammâ ba‘d, Dârü’s-saltanati’s-seniyye Kostantıniyyeti’l-mahmiye mahallâtından Sarı Bayezid mahallesinde sâkin fahrü’l-muhadderât sâhibetü’l-hayrât ve tâlibetü’l-meberrât Kerime Hatun bt. Mustafa meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda vakf-ı âti’l-beyânı tescîl ve emr-i vakfı tekmîl için mütevellî nasb eylediği kıdvetü erbâbi’t-tahrîr ve’l-kalem zübdetü ashâbi’t-takrîr ve’r-rakam Mahmud Efendi b. Mehmed muvâcehesinde ikrâr u i‘tirâf edip mahalle-i mezbûrede vâki‘ bir tarafı Ali Paşa mülkü ve bir tarafı merhûm Veli Kethüdâ veresesi mülkü ve bir tarafı mahalle-i merkūme mescidi müezzinine vakf olan menzil ve bir cânibi tarîk-i âm ile mahdûd olup muhavvata-i dâhiliyyesi üç bâb fevkānî hucurâtı ve ıstablı ve zulleyi ve bi’r-i mâ’î ve cüneyne-i zât-ı eşcâr-ı müsmire ve gayr-ı müsmireyi ve muhavvata-i hâriciyyesi üç fevkānî odaları ve altında ahırı ve kenîfi ve bennâ zirâ‘ıyla tûlen on zirâ‘ ve arzen dört zirâ‘ arsayı müştemil olan mülk menzilimi cümle-i tevâbi‘ ve levâhıkıyla mukaddemen hâlisen li-vechillâhi’l-ferdi’s-samed vakf-ı sahîh-i müebbed ve habs-i sarîh-i muhalled ile vakf ve habs edip ben hayâtda oldukça menzil-i mezkûrun tasarrufu yedimde olup vefâtımdan sonra muhavvata-i hâriciyyesinde olan arsa-i mezbûr Haremeyn-i Şerîfeyn mütevellîsi yediyle îcâr olunup hâsıl olan icâresi Medîne-i Münevvere fukarâsına îsâl oluna ve muhavvata-i hâriciyyesinde olan üç bâb odaların tasarrufu mu‘takalarım Hidayet bt. Abdullah ve Dilaver bt. Abdullah ve İnayet bt. Abdullah’a ve evlâd-ı evlâd-ı evlâdlarına meşrût olup ba‘de’l-inkırâz fukarâ-i mezbûreye meşrût ola ve tebdîl ve tağyîri yedimde ola deyu mukaddemâ vakfiye-i ma‘mûlün-bihâsında tansîs etmiş idim, el-hâletü hâzihî şurût-ı mezkûreden rücû‘ edip şöyle şart eyledim ki menzil-i mezkûrun muhavvata-i dâhiliyyesi ve muhavvata-i hâriciyyesi müştemilâtıyla vefâtımdan sonra vech-i muharrer üzere Medîne-i Münevvere fukarâsına meşrût ola ve muhavvata-i dâhiliyyesinde olan cüneynede ahlas mâlımdan hâlâ Hızırbey mahallesi tarafında olan tarîka kapıları feth olunur müceddeden binâ-i vâhid ve merâfık eylediğim dört bâb cedîd odalardan birinin süknâsını mezbûre Hidayet’e ve birinin süknâsını merkūme Dilaver’e ve birinin süknâsını mesfûre İnayet’e ve evlâdlarına ve evlâd-ı evlâd ve evlâd-ı evlâdlarına şart eyledim, birinin evlâdı münkarız olucak mutasarrıf olduğu odası fukarâ-i merkūmeye meşrût olup ve mârru’z-zikr dört bâb odalardan bâkī bir bâb odanın tasarrufu dahi yedimde ola, vefâtımdan sonra zikr olunan bir bâb oda îcâre olunup hâsıl olan îcâresi zikr olunan mu‘takalarımın mutasarrıfe oldukları mezkûr üç bâb odaların meremmetine meşrût olup ve ba‘de inkırâzihim zikr olunan bir bâb cedîd oda dahi kezâlik fukarâ-i merkūmeye meşrût ola deyu menzil-i mezbûru ve sâlifü’z-zikr dört bâb cedîd odaları dahi fâriğan ani’ş-şevâgil mütevellî-i mesfûr Mahmud Efendi’ye teslîm ettim, ol dahi vakfiyet üzere kabz ve tesellüm eyledi dedikde vâkıfe-i mezkûreyi cümle kelimâtında mütevellî-i mûmâ-ileyh bi’l-müvâcehe tasdîk eyledikden sonra vâkıfe-i mezbûre kelâmını semt-i âhara sârif olup vech-i me’lûf ve meşrû‘ üzere da‘vâ-yı rücû‘ edip vakf-ı akār İmâm-ı A‘zam ve hümâm-ı efham sirâcü’l-ümmet muktedâyü’l-eimme Ebû Hanife [154b] Numan b. Sabit el-Kûfî -cûziye hayre’l-cezâ ve kûfiye- katında lâzım olmayıp âna ta‘lîk olunan şart sahîh olmağın vakfdan rücû‘ ettim, pes akār-ı mezbûru kemâkân mülküme red murâd ederim deyu istirdâd edicek, mütevellî-i mezbûr Mahmud Efendi cevâb-ı bâ-savâba mutasaddî olup eğerçi vakf-ı akār ol imâm-ı celîlü’l-kadr katında lâzım olmayıp lâkin imâmeyn-i hümâmeyn bedreyn-i tamâmeyn Ebû Yusuf imâm-ı sânî ve’l-imâmü’s-sâlis Muhammed b. Hasan eş-Şeybânî katlarında sahîh ve lâzımdır deyu redden imtinâ‘ etmekle beynlerinde nizâ‘ vâki‘ olmağın muvakkı‘-ı sadr-ı kitâb tûbâ-leh ve hüsn-me’âb huzûrunda murâfa‘a olduklarında gıbbe’t-te’emmüli’t-tesâduk ve’n-nazari’l-lâyık hâkim-i mûmâ-ileyh -en‘amallâhü ni‘amehû aleyh- tarafeynin delîlinde teemmül-i melî ve cânib-i mütevellîde rüchân-ı celî müşâhede edip cânib-i vakfa nazar ve mennâ‘un li’l-hayr zümresine ilhâkdan hazer edip ol iki imâm-ı celîlü’ş-şân ve celiyyü’l-burhân mezheb-i şerîfleri üzere lüzûmuna dahi alâ-vechi’l-mütehâsımeyn hükm edip cümel-i hısâmları infisâm bulup vakf-ı sahîh lâzib olup min-ba‘d nakz ve nakzına mecâl muhâl ve ihtilâl ve ibtâli mümteni‘ü’l-ihtimâl oldu, “Fe-men beddelehû ba‘de mâ-semi‘ahû fe-innemâ ismühû ale’llezîne yübeddilûnehû innallâhe semî‘un alîm” ve ecrü’l-vâkıf ale’l-hayyi’l-cevâdi’l-kerîm, cerâ zâlike ve, Hurrire fî-evâili Rebî‘i’l-evvel li-sene seb‘a ve selâsîn ve elf. Şühûdü’l-hâl: Ahmed Efendi b. Mehmed el-imâm, Ali Efendi b. ( ) el-imâm, Mustafa Efendi b. Şükrullah el-müezzin, Sefer Subaşı b. Hasan Dergâh-ı Âlî, el-Hâc İbrahim b. Abdullah Mi‘mâr, İbrahim b. Mehmed el-kayyim, Dilaver b. Abdullah, Ahmed b. Süleyman, Ali b. Hamza, Abdurrahman Efendi b. Mustafa el-imâm, el-Hâc Bayram b. Süleyman Türbedâr, Kemhâcı Ali b. Ali, Mustafa Halîfe b. İlyas, Ahmed Dede b. Mahmud el-kayyim, fahrü’l-emâsil ve’l-akrân İbrahim Ağa b. ( ), Zekeriya Çorbacı b. Hüsrev, fahrü’l-cüyûş Yahya Çavuş b. Mehmed, Hızır Çelebi b. Mehmed, Abdurrahman b. Hüseyin, Ali Bey b. Abdullah el-bevvâb, Yusuf Beşe b. Abdullah er-râcil ve gayruhüm.