Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 533 Hüküm no: 469 Orijinal metin no: [154b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abbas Ağa Vakfı mütevellisi İdris Ağa b. Mehmed’in vakfa ait Çelebioğlu mahallesindeki ev ile Altımermer mahallesindeki çeşmenin su yolunu tamir ettirmesi Mahmiye-i Kostantıniyye’de vâki‘ merhûm Abbas Ağa Vakfı’na mütevellî olan fahrü’l-akrân İdris Ağa b. Mehmed meclis-i şer‘-i şerîfe gelip takrîr-i kelâm edip vakf-ı mezbûrdan olup mahmiye-i merkūmede Çelebioğlu mahallesinde inde’l-cîrân ma‘lûmü’l-hudûd olan fevkānî vakıf menzilin tahta-pûşu ve câmeşuyhânesi ve yine mahmiye-i merkūmede Altımermer’e cârî olan vakıf çeşmesinin suyolu mürûr-ı eyyâm ve kürûr-ı a‘vâm ile harâb ve ta‘mîre muhtâc olmağla izn-i şer‘le mevâzi‘-i mezkûru ta‘mîr etmiş idim, el-hâletü hâzihî savb-ı şer‘den üzerine varılıp ihdâs ettiğim ebniyenin ne mikdâr akçeye tahammülü vardır, takvîm-i sahîh ile takvîm ve tahmîn olunmak matlûbumdur dedikde kıbel-i şer‘den Mevlânâ Hasan Efendi ve hâssa mi‘mârlardan Üstâd Ali Çelebi b. Halil irsâl olunup zeyl-i mastûrda isimleri mastûr olan Müslimîn ile üzerine varılıp mu‘âyene ettiklerinde fi’l-hakīka zikr olunan tahta-pûşun müceddeden ahşâb ve elvâh ve mesâmîr-i mütenevvi‘a ve kaygan taş ve kireç ve horasan ve lökün ve neccâriyesi ve mezkûr câmeşûyhânenin seng-i âteş ve ahşâb ve elvâh ve mesâmîr-i mütenevvi‘a ve neccâriye ve ırgadiye ve hammâliyesi beş bin üç yüz on altı akçe ve mârru’z-zikr çeşmenin suyolu meremmâtına ber-mûceb-i defter-i müfredât mütevellî-i mezbûr iki bin dört yüz seksen akçe ki cem‘an yedi bin yedi yüz doksan altı akçeye tahammülü vardır, ekalli ile olmak mümkün değildir deyu ittifâk ettiklerinin mevlânâ-yı mezbûr mahallinde tahrîr ba‘dehû gelip [155a] meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Hurrire fi’l-yevmi’l-hâmis aşer min-Zilka‘deti’ş-şerîfe li-sene sitte ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Ali Bey b. Abdullah el-bevvâb, Hüseyin Bey b. Abdullah el-cündî, Mehmed Efendi b. Muharrem, İbrahim Beşe b. Abdullah ve gayruhüm.